Weather Fiji, Suva   Max 30°C, Min 23°C

Fiji Sun

NATION

Vakadeitaki Tiko na Bibi ni Valuti na Draki Veisau

Vakadeitaki Tiko na Bibi ni Valuti na Draki Veisau
Na Minisita ni Teitei o Inia Seruiratu (mawi) ka vulagi dokai ki na voleni vakaivalu ni koronivuli na Saint Vincent College e Natovi e nai ka 9 ni Okosita, 2018. Dau ni veitaba: RFMF Media Cell
August 11
10:19 2018

Ko Viti e dua na matanitu ka tutaka vakaukauwa na kena valuti na draki veisau ka sa yacova tu ena noda vuravura edaidai.

E vakaraitaka na Minisita ni Teitei, ka Jabeni ni Draki Veisau  e na noda vanua, o Inia Seruiratu, ni sa tekivu me vakilai e Viti na draki veisau.

“E vakilai sara vakalevu e na veimatanitu lelevu ka ra vakaitavi vakalevu e na buli yaya,” e tukuna o Seruiratu.

Na draki veisau e tukuna o Seruiratu ni vakavuna na kubou mai na veivanua ni buli yaya ka ra kaburaka ki na maliwa lala.

E dua talega na vuna na kena sa ta laivi na veivunikau lelevu.

Sa tekivu tiko e Viti edaidai na kena sa ta na veikau lelevu mera volitaki ka vakabalei eso me solia na galala ki na dua na veivakatorocaketaki me caka e na so na vanua esa digitaki. E dua na ka sa laurai tiko e na noda vanua, na veivakatorocaketaki sa yaco mai, e levu era gadreva e dua na tiki ni qele levu me tauyavu kina. Ni tekivutaki na kena tauyavu e na ta laivi na veikau ka vakagalalataki sara vakavinaka na vanua me qai tekivu na tara ni veivale lelevu ni cakacaka.

Mai wai e tukuna o Seruiratu e  sa ta laivi na dogo, ka so e vakayagataki me buka. Na dogo era bula kina na ika kei na so tale na sasalu ni waitui. Ni sa yali na dogo, e tukuna o Seruiratu era sa yali talega na ika  kei na sasalu.

Na lewenivanua era bula mai na veika era dau kune e na veidogo, era sa na vaqara tale eso na ka me sosomitaka. Na valuti ni draki veisau e tokona ka cakacakataka vakalevu o Viti. Era sa vakamuria mai na yanuyanu e na Pasivika ka ra sa solia na nodra veitokoni eso na veimatanitu lelevu. Sa tekivu me katakata mai o Viti ka sa tau na uca bi ka vakavuna tiko na ualuvu, sisi ni qele kei na ca ni gaunisala.

Na levu ni uca e dau tau e na lomani tolu na vula, e tukuna o Seruiratu ni sa rawa ga ni tau e na loma ga ni rua se tolu na auwa.

E nai teitei e ra sa mate mai na kakana era dau teivaka na noda qase ka ra toso vakayawa na dauteitei ki na veivanua bulabula. E na veikorokoro e na matasawa sa tekivu me kania mai na ua na veinuku ka vuna na kena tokitaki ki na dua tale na vanua. Ni da vakaweleweletaka na draki veisau, e tukuna o Seruiratu, e rawa ni da vakaleqai kina. Sa veivakasalataki raraba yani o Seruiratu meda duavata e na kena valuti na draki veisau.

Na turaga na Paraiminisita, o Voreqe Bainimarama, e peresitedi ni soqosoqo ni veimatanitu e na veiyasai vuravura ka ra cakacaka vata e na kena valuti na draki veisau.

E na gauna oqo e tukuna o Seruiratu era sa cakacaka vata na veimatanitu lelevu e na kena cakacakataki na veidinadinati ka vakatokai tiko na ‘Paris Agreement’.

Sa vakauqeti ira nai tabagone mera kauwaitaka na draki veisau ka veivuke e na kena tarovi e na nodra veivanua. Na draki veisau e sa yacovi keda tiko e na gauna oqo, era kaya na dau ni vakadidike ni da vakavuna tikoga na tamata.

E tukuna e dua na dau ni vakadidike – “Na draki veisau e rawa ni vakaleqa na veivakatorocaketaki e vuravura ka sa sagai me sabaya na kena revurevu. Sa vakilai na toso ni yalayala ni wai, na sugu ni waitui kei na sisi ni qele ena veikoro ena baravi e Viti.

“Na Yavutu ni Draki Veisau e matata tu kina mera vararamataki na lewenivanua ena nodra dui vosanivanua. E laurai ni ra na valeqai vakalevu na tiko e taudaku ni koro vakavalagi mai na revurevu ni draki veisau. Qo e vu mai na nodra vakararavi vakalevu ena veikabula e tu wavoliti.”

Feedback:  maikab@fijisun.com.fj

Share

Related Articles

you said it
"I support it 200 percent, I am with FRU, the country and the people of Fiji. We want to bid to get one of the HSBC stops in Fiji."
Waisale Serevi
Sevens Legend

Latest Photo Gallery

Fijisun Online @Instagram