Weather Fiji, Suva   Max 30°C, Min 23°C

Fiji Sun

NATION

SIGA VOU: Veisau na Vakarautaki na timi Rakavi ni Drua

SIGA VOU: Veisau na Vakarautaki na timi Rakavi  ni Drua
Na kavetani ni Fiji Airways Fijian Drua o Mosese Voka. Dau ni veitaba: Karalaini Tavi
August 29
15:51 2018

Sa mai tekivutaka na dau ni veivakatavulici ni Fiji Airways Fijian Drua o Senirusi Seruvakula, na veisau ni nodratou vakarautaki na timi e na sotasota ni rakavi ni Ositerelia ka vatatokai na  National Rugby Championship (NRC).

E vakataivi e na NRC na veitimi oqo – Brisbane City, Canberra Vikings, Fijian Drua, NSW Country, Melbourne Rising, Queensland Country, Sydney Rays kei na Western Force. Na sotasota levu oqo e vakaraitaka o Seruvakula ni gadreva na tuvaki vinaka ni yago, vakasama kei nai cegu.

“Oqo e sega ni sotasota rawarawa baleta ko ira kece na veitimi era  sa vakarautaki ira vinaka,” e tukuna o Seruvakula.

E na kena vakarautaki na timi, e tukuna o Seruvakula ni sa tu sara ga vei ira na dauqito na nodra dinata, na ituvatuva ni nodra vakaukauwa yago e sa veisoliyaki vei ira.

“Sa sega na keba me vaka e dau vakayacori e liu.”

E tukuna ni rua ga na siga era na sota vata kina, ko ya e na siga Tusiti kei na siga Lotulevu. Na vo ni siga e tukuna e sa nodra  sara ga na dauqito.

E tukuna ni oqo na mataqali vakaukauwa yago era sa vakayagataka tu na veitimi lelevu e vuravura, me vaka na timi rogo levu ni Niusiladi na All Blacks.

E na siga Tusiti kei na Lotulevu, era dau tekivu tereni e loma mera vulica na lawa ni rakavi, kei na veika tale eso na lewe ni timi. Era dau mai vakaroti ira na lewe ni timi, e tukuna  o Seruvakula, me ra kauta mai e dua na peni kei na dua nai vola.

Ni ra dau vuli, e tukuna o Seruvakula, ni dau vinakata mera vola na veika era vulica, ka mera dau qai la’ki vakawilika e na nodra gauna galala.

Na nodra vakarautaki e kuria, e vakatotomoria na nodra vakarautaki na veitimi lelevu ka ra vakaitavi kina ko ira era sa saumi e na qito.

E tukuna ni levu vei ira na dau qito era sa sainitaki konitaraki vei ira eso na timi mai valagi, era sega ni rawata na bula era la’ki sotava.

Na vuna e tukuna ni a sega ni dua na vakavakarau, era curuma yani e Viti me baleta na bula e na qito saumi. E na vakavakarau  e na qito kei na Melbourne Rising e na Vakarauwai oqo e na rara na Ratu Cakobau Park, e tukuna ni sa toso vinaka tiko ka dodonu me dua na qito vinaka.

E tukuna o Seruvakula ni vakavakarau e sa vakayacora tiko e na gauna oqo, e wili kina na nodra sainitaka na nodra konitaraki kei na bula era na la’ki sotava.

Sa kerea tiko o Seruvakula mera lako yani vakalewe levu na dau ni veitokoni ki na rara na Ratu Cakobau Park, mera la’ki tokona na timi. Na qito eratou na dolava ka vakaciciva a cauravou.

Era na dola rara tiko na timi mai Ositerelia, ka ra lewena tiko ko ira eso na gone iTaukei era sa daramaka oti na siqeleti ni timi rogo ni Ositerelia na Wallabies, kei na dua na timi e na noda vanua. E na tekivu na qito levu e na 3 na kaloko e na yakavi.

Na vo tale ni nodratou qito na Fiji Airways Fijian Drua – Seviteba 9 kei na Brisbane City (Viti), Seviteba 15 kei na Queensland Country (Ositerelia), Seviteba 23 kei na Sydney Rays (Ositerelia), Seviteba 19 kei na NSW Country (Ositerelia), Okotova 06 kei na Canberra Vikings (Ositerelia) kei na Okotova 13 kei na Western Force (Ositerelia).

Feedback:  maikab@fijisun.com.fj

Share

Related Articles

you said it
"I support it 200 percent, I am with FRU, the country and the people of Fiji. We want to bid to get one of the HSBC stops in Fiji."
Waisale Serevi
Sevens Legend

Latest Photo Gallery

Fijisun Online @Instagram