Siga Vou

Dei Na Veitokoni Me Baleta Na Thurston Gardens

E tukuna o Ratulevu ni qele ka veivosakitaki tiko oqo e nona na matanitu, ka na lewa o koya na veika me vakayacori kina.
27 Feb 2019 14:56
Dei Na Veitokoni Me Baleta Na Thurston Gardens
Na qele enaThurston Gardens me na tara kina na valenivolavola ni Matanitu o Idia.

Eso E dei tiko na nodratou veitokoni mai na Mataqali Vatuwaqa e Suvavou, ena lewa sa koto me baleta na kena tara na Valenivolavola ni Matan­itu o Idia ena Thurston Gardens.

Na gusu ni vosa ni mataqali o Watisoni Ratulevu e vakadei­taka mai ki na Siga Vou e nanoa, ni ratou wili tiko ena veitokoni na iTokatoka o Tamavua kei na iTokatoka o Nadonumai ena Mataqali Tuirara.

E tukuna o Ratulevu ni qele ka veivosakitaki tiko oqo e nona na matanitu, ka na lewa o koya na veika me vakayacori kina.

“O cei tale me na vosa ena lewa ni matanitu me baleta na qele oqo?” e taroga o Ratulevu.

E vakaraitaka ni dina era va­kayagataka na nodra dodonu na veimataqali e Suvavou ena nodra na la’ki biuta na nodra vakatutu ki na Matabose ni Koro o Suva, ia, e sega ni dua na ka eratou na cakava ni ratou sega ni taukena na qele.

Ko ira na mataqali oqo e tukuna ni ra a kauta vakaveilewai na nodra taukena na qele e Suva, ia, e vakacala na Mataveilewai levu mai Lautoka, ka tukuna ni qele e sa nona na matanitu.

Na leqa era sa mai coko tu kina oqo, e tukuna o Ratulevu, na nodra sa la’ki vakayagataki mai vei ira na dau ni politiki.

Ko ira oqo mai na isoqosoqo na SODEDLPA era a yalataka ni ra na valataka na nodra kisi ni qele na veiliutaki ia e mani sega.

E vakadeitaka mai o Ratulevu ni a lako yani ki Suvavu o Niko Nawaikula enai ka 7 ni Veverueri me la’ki sota kei ira na ilawalawa oqo.

Sa kerekere o Ratulevu kivei ira na dau ni politiki, mera kakua ni tukuna eso na itukutuku lasu kivei ira na iTaukei ni qele.

Ke dua na ka e baleta na qele, sa tiko na Tabacakacaka ni Qele Maroroi kei na Tabana ni Qele ni Matanitu mera la’ki vaqara ivakasala kina.

Feedback: maikab@fijisun.com.fj

 

Fijisun E-edition
Advertise with fijisun
Subscribe-to-Newspaper
Fiji Sun Instagram
Fiji Plus
Subscribe-to-Newspaper
error: