Siga Vou | Sigararama

Marautaki na Veivuke ni Matanitu o Javani

Ena macawa sa oti ea veisoliyaka kina na Minisita ni Qoli o Semi Koroilavesau na kato ni wailiwaliwa vata kei na sola kina walu na koro ena lima na tikina ena yasana o Ba. Na veivuke levu oqo e vakailavotaka na matanitu o Javani.
05 Mar 2022 21:00
Marautaki na Veivuke ni Matanitu o Javani
Na Minista ni Qoli o Semi Koroilavesau kei ira e Bukama mai Yasawa ni oti na kena soli na nodra kato ni wai liwaliwa kei na sola ka vakailavotaka na matanitu o Javani.

Ena macawa sa oti ea veisoliyaka kina na Minisita ni Qoli o Semi Koroilavesau na kato ni wailiwaliwa vata kei na sola kina walu na koro ena lima na tikina ena yasana o Ba.

Na veivuke levu oqo e vakailavotaka na matanitu o Javani.

Ea solia na matanitu o Javani e FJ$186,400 kina Tabana ni Qoli mera voli kina vata kei na kena sola.

 

Na veivuke vakailavo mai Javani e lako mai ena veivuke me baleti ira na lewenivanua ka yacana tiko na ‘Grant Assistance for Grassroots Human Security Projects’ (GGP).

E solia tiko na veivuke qo na matanitu o Javani ena kena ravuti Viti na mate na COVID-19 ka vakacacana vakalevu na nodra bula vakailavo na lewenivanua.

Na va na tikina qo e wili kina o Yasawa, Nacula, Naviti kei Waya.

 

Ena tikina o Yasawa e soli kina koro o Yasawa Irara, Daloma vata kei Bukama, ena tikina o Nacula e soli ki Naisisiri, ena tikina:
o Naviti e soli ki Gunu kei Kese kei na tikina

o Waya e soli ki Wayalevu kei Natawa.

 

Ko ira a cakacaka ena otela ena veitikina qo era a vakacegui me baleta na mate na Covid-19

Na veikoro oqo e nodra ivurevure ni bula kei na ilavo na qoli ena nodra iqoliqoli.

Ena nona raica na matanitu o Javani na dredre era sotava tiko, e a qai solia kina na nodra kato ni wailiwaliwa vata kei na kena sola.

 

Era marautaka vakalevu kara tukuna na dau qoli ni sa na rawa mera qoli vakalevu ka biu ena kato ni wailiwaliwa ni bera na kena volitaki ki Lautoka.

Na porokaramu na GPP e vakayacori vakalevu ena vuli, vakadrodroi ni wai, Tabana ni Bula kei na Tabana ni Veilakoyaki ka tekivutaki ena 1990.

Me yacova tiko mai oqo e sa qaravi e 403 na porokaramu ka kena isau e tautauvata ni $29 na milioni nai lavo ni Mereke.

 



Fijisun Ad Space


Get updates from the Fiji Sun, handpicked and delivered to your inbox.


By entering your email address you're giving us permission to send you news and offers. You can opt-out at any time.


Subscribe-to-Newspaper