Siga Vou | Sigararama

 Takosova O Mototabua Na Veimama Ni Vuravura

Ena siga Moniti ena macawa oqo, era a marautaka kina na kai waqa ena waqa ni contain­er na ‘MV Papuan Chief’ na matai ni nona a takosova na veimama ni vuravura ko Vasiti Adituraga Mo­totabua.
02 Oct 2022 14:49
 Takosova O Mototabua  Na Veimama Ni Vuravura
E ciqoma tiko oqori na nona sitivikiti ko Vasiti Adituraga Mototabua ena siga Moniti ena waqa na MV Papuan Chief.

 

Ena siga Moniti ena macawa oqo, era a marautaka kina na kai waqa ena waqa ni contain­er na ‘MV Papuan Chief’ na matai ni nona a takosova na veimama ni vuravura ko Vasiti Adituraga Mo­totabua.

Ko Mototabua e cakacaka tiko vaka ‘Ordinary Seaman’ ena MV Papuan Chief ka nona tiko na ka­bani na Swire Shipping.

Esa vula dua nikua na nona soko­ta voli tiko na wasawasa vaka Esia kei na Pasifika, ena loma ni walu na vula nona konitaraki.

Na sitivikiti ka a soli vei Vasiti Adituraga Mototabua ena nona soko takosova na veimama ni vuravura (equator) ena waqa na MV Papuan Chief.

Na sitivikiti ka a soli vei Vasiti Adituraga Mototabua ena nona soko takosova na veimama
ni vuravura (equator) ena waqa na MV Papuan Chief.

E dua talega na vuli levu vua me vaka ni se qai matai ni gauna me vodoka kina na waqa ni container ka gole ki vanua tani.

Ko Mototabua e soli vua na sitivi­kiti ni imatai ni gauna me qai soko takosova kina na veimama kei vu­ravura (equator). Ei matai talega mai na nona vuvale me takosova na veimama ni vuravura.

E sa yabaki 26, ka cavutu mai ena koro o Nakalawaca, Namalata mai Tailevu, o koya e dua vei ira na lewe ono na gone iTaukei era caka­caka voli ena waqa ni container.

E tolu na luvena tagane ka se qai vula ciwa tiko okoya gone duadua.

NA SOQO ENA LOMA NI WAQA

A nona tatadra voli tu mai o Mo­totabua me na soko takosova na veimama kei vuravura ena dua na gauna me vaka na veika e a vulica mai koronivuli.

E a sega sara ni namaka ni na mai yaco me dina na nona tatadra ena nona soko voli tiko oqo.

“Au sega ni kila na nodratou sa bosea tiko mai ena loma ni macawa dua na noqu i tokani vakacakacaka ena lomani waqa, me ratou na va­kayacora e dua na soqo oqo me bal­eti au,” e kaya o Mototabua.

E duri tu ena loma donu ko Vasiti Adituraga Mototabua kei rau na nona itokani vakacakacaka ena waqa na MV Papuan Chief.

E duri tu ena loma donu ko Vasiti Adituraga Mototabua kei rau na nona itokani
vakacakacaka ena waqa na MV Papuan Chief.

“Ena gauna ni neitou bose ena mataka lailai ni siga Moniti, sa vei­waseyaki nai tavi ka sa soli vei au nai tavi meu laki sasamaki taudua toka ena mua-i-liu ni waqa.

“Ena gauna oqo, e ratou sa laki vakavakarau lo toka mai kina ena soqo na noqu itokani.

“Sa donuya na gauna ni vaka­cagicagi mai na 10 kina veimama ni 10 na kaloko, sa kauti au sara o Bosoni vei neitou ivukevuke ni kavetani (chief mate).

E sa laki vakatarogi au o neitou ivukevuke ni kavetani ena vuqa na taro me baleta na soko.

“Sa tauri vei au na noqu talevo­ni, kau sa mani nanuma deivaki niu sa vakarautaki tiko ena dua na veitarogi (exam).

“Au kidacala ka salavata na levu ni noqu domobula ni sa mai vesu­ka na ligaqu o Bosoni, ka mai kau­ti au sara ki na vanua era sa laki wawa tu mai kina na kai waqa.

“Era sa vakaisulu tu me vaka­taki ira na dausoko ena gauna iliu (pirates). E ra vakaisulu suwai tu, ubi tu na uludra ena i tavoi era tauri matau se i sele ni vala, ka so e ubi tu e dua na matadra,” e kaya o Mototabua.

“Na neitou tuirara-ni-waqa (ship steward) e vivigi koya tu ena lawa ka dara tu edua na ulu cavu kara­karawa.

“E daramaka toka e uluna e dua nai sala ni tui, ka taura tu e ligana e dua na titoko balavu.

“Oqo e vakatamurimuria nai sulusulu nei Tui o Triton ena yaloyalo ka dau saravi ena raitio yaloyalo ka yacana na Aquaman of the Seven Seas.

“Sa qai boro e mataqu na falawa, lausui ena wai, vakagunuvi ena moli wiwi, au qai tawa ena lomani dramu.

“Ni oti oqo, sa qai solia vei au na noqu sitivikiti o tuirara-ni-waqa niu sa takosova enai matai ni gau­na na veimama ni vuravura.”

E tomana o Mototabua ni vuqa na gauna e dau sotava kina na dredre ena nona dau vakanananu lesu mai ki vale, ka vakabibi ni ra­tou se lalai na gone, ka ni se qai matai ni gauna oqo me biuti ira­tou tu mai me walu na vula.

Ko Vasiti Adituraga Mototabua e ciqoma tiko nona sitivikiti ena waqa na MV Papuan Chief.

Ko Vasiti Adituraga Mototabua e ciqoma tiko nona sitivikiti ena waqa na MV Papuan Chief.

IVAKASALA

E vakasalataki ira na gone era nanuma tiko me ra na lai tomani koya: “Au kerei kemuni mo ni na mai gugumatua sara na cakacaka, me yaga kina na vuli kei na vosota ni kena sasagataki tu na qaravi ni vuli. Ni tuvatuva-ka kina veika vinaka me rawa ni oni na tosoya cake nai vakatagedegede ni koroi ni vuli oni sa rawata.”

VULI ENA PRIMARY

  • Lautoka Andhra Primary School

VULI ENA SECONDARY

  • Lautoka Andhra Sangam Col­lege (Form 3 – 4)
  • Tailevu North College (Form 5)
  • A.D.Patel College (Form 6)

VULI TOROCAKE

  • Fiji Maritime Academy ena ya­baki 2014 ka rawata mai kina na nona sitivikiti ni Deck Watch Rat­ing (DWR).

NONA CAKACAKA

  • Deck cadet ena kabani ni South Sea Tower;
  • Deck Watch Rating ena Gound­ar Shipping Services;
  • Deck Watch Rating ena Captain Cook Cruises;
  • Administrative Assistant ena Fiji Elections Office (2022) ni bera ni dewa yani na waqa ni contain­er.

 

Story By: ray@fijisun.com.fj



Fijisun Ad Space


Get updates from the Fiji Sun, handpicked and delivered to your inbox.


By entering your email address you're giving us permission to send you news and offers. You can opt-out at any time.


Subscribe-to-Newspaper