Esa toso vinaka sara tiko na caka­caka ena loma ni yanuyanu vaka turaga mai Bau, ena vakavakarau kina Bose Levu Vakaturaga (BLV).

E vakaraitaka mai ko Aisea Komaitai, na gusu ni vosa ni Turaga Bale na Vuni­valu na Tui Kaba, ni ra lewe 25 na idinia ni Matainivalu ni noda vanua era sa tekivu cakacaka tiko ena kena vakavi­nakataki na vale ni bose na Ulunivuaka na vanua ena vakayacori kina na BLV.

Na vale ni bose na Ulunivuaka na vanua ena vakayacori kina na Bose Levu Vakaturaga.

Na BLV ena dolavi tiko ena i ka 23 ni siga ni vula oqo ko Me, ka na vakacavari tiko ena i ka 25 ni siga.

Tukuna ko Aisea ni sa tolu na siga na nodratou samaka ka musuka tiko na Ta­bana ni Veikau eso na vunikau lelevu era tiko ena loma ni yanuyanu. Tomana ka kaya ni ra sa tekivu boro talega eso na veivale, ka’ra sa dui samaka ga nodra dui tikotiko na lewe ni yanuyanu.

Tekivu boro vinaka eso na veivale ena loma ni yanuyanu

VEISIKO NA MARAMA BALE NA ROKO TUI DREKETI.

E vakadeitaka mai ko Aisea ni a veisiko yani i Bau ena macawa sa oti na Marama Bale na Roko Tui Dreketi ka kauta yani eso nai yaya ena vakavaka­rau ni BLV.

E tukuna ni oqo na nodrau sala ga ni veiwekani vakavanua ena vimataki o Burebasaga kei na Tuinitoga.

Tomana ka kaya ni dau vakarau yaco e dua na soqo levu e Bau, ena dau yaco mai liu na marama Roko Tui Dreketi me kauta yani eso nai yaya vua na Vu­nivalu.

Era sa solia talega nodra vakanuinui vinaka na Roko Tui Dreketi ki vua na Mataki Burebasaga kei na vanua o Kubuna ena nodra vakavakarau.

Nai otioti ni BLV a vakayacori mai Bau ena yabaki 1982.

To read more, click on this link to access the full article and details: https://eedition.fijisun.com.fj/subscriptionplans

Story By: aselemo.tabuakacivi@fijisun.com.fj