Kevaka eda vinakata me da rawata vinaka na noda vuli, cakacaka se tuvatuva cava ga eda lalawa ka tiko kina, sa dodonu meda na cakacakataka.  

Ena rawa ni da masu ka lolo, ia ke sega nio cakacakataka ena ka wale ka sega ni vakavotukana. E veibolei tiko vei keda ena macawa oqo ko Joape Anare e dua na luveda ka cakacaka tiko ena waqa ni saravanua na P&O Cruises Australia.  

Ko Joape e cavutu mai ena koro ko Dakuni mai Beqa. E levu sara na dredre e lako curuma mai ia e sega vakadua ni yalolailai ka dei tiko ga ena nona tatadra.  

Ni wilika mada na nona italanoa.  

NI VAKAMACALATAKA MADA NA VANUA NI VULI MAI KINA?  

Au kalasi 1 kina 8 e Lami Primary School toka ga qori e Lami Koro. Qai lai va oti vuli e Suva Sangam College, dewa sara yani na Koro ni vuli ni vuli cakacaka ena Otela ni Saravanua na Service PRO International Tourism Hospitality.  

NI VAKAMACALATAKA NA VANUA ESO O NI SA CAKACAKA OTI MAI KINA?  

E tekivu na noqu cakacaka ena Quest Serviced Apartment e Suva, bera niu dewa yani ena yasayasa-vaka-ra. Au cakacaka ena Malolo Island Resort/Cloud 9 Floating Bar & Restaurant/Plantation Island Resort/Tropical Island Resort/Radisson Blu Resort Fiji/Tanoa International Hotel/ Palms Denarau/Suva Motor Inn.  

NI VAKAMACALATAKA NA VANUA O NI SA CAKACAKA TIKO KINA ENA GAUNA OQO? 

 Ena gauna oqo au cakacaka tiko ena P&O Cruises Australia. Oqo na nodratou waqa na Pacific Adventure. E dua vei ratou na tolu na waqa lelevu ka vakarurugi ena kabani na P&O Australia. Au a tekivu ena yabaki sa oti ena vula o Julai ena nodratou matai ni waqa na Pacific Explorer.  

Au tekivu ena ‘Guest Services Desk’ ka noqu itavi meu dau qarava na nodra vakatataro na pasidia kei na vei vakatataro tale eso me baleta na veiqaravi e vakayacori e waqa. Oqo e sai karua ni noqu konitaraki, au sa tiko ena Crew Office ena i tutu vaka ‘Assistant Crew Manager’.  

Na noqu itavi ena i tutu oqo sai koya meu veiqaravi vei ira na kai-mua. Noqu veiqaravi e dau vakatabakidua ena nodra qaravi kei na nodra golegole lesu kina nodra vanua ni oti na nodra konitaraki vaka talega kina na nodra golegole mai nodra vanua mera mai cakacaka e waqa.  

NA CAVA E VAKAUQETI KEMUNI MO NI GOLE ENA CAKACAKA OQORI KEI NA VUNA?  

Au a vakauqeti ena cakacaka e waqa ni oti e dua na neitou vuli vakacakacaka ena gauna au se cakacaka voli tiko kina ena Plantation Island Resort mai Malolo, Nadi.  

E mai caka vuli vei keitou e dua na kena dau (trainer) o Epeli Drau, ka’u vakabauta ni sa cakacaka tiko oqo ena Norwegian Cruise Line. Ena dua na nona vakamacala e qai wasea tiko kina okoya na nona a cakacaka tu e waqa kei na veivanua e vaka lakova voli.  

E vakauqeti au vakalevu na nona italanoa, ka mani malele saraga kina na yaloqu me dua na gauna meu sana sasaga ena waqa ni saranavanua e valagi.  

OQORI NA CAKACAKA O NI A VINAKATA TU MAI NA GAUNA NI SE LALAI KINA?  

Au a susu mai e nakoro vei rau na tubuqu (noqu Bu kei noqu Tai) rau sa vakacegu ruarua. E vei gauna keitou dau mai basa ena makete levu e Suva, au dau raica na waqa lelevu ni saravanua ni dau kele tu. Au diva me dua na gauna meu na cakacaka e waqa.  

Au mai vuli e Suva Sangam College, vei gauna ni dau kele mai na waqa lelevu ni saravanua e Suva, au dau diva wale tuga me dua na gauna meu na cakacaka kina.  

SA YABAKI VICA NA NOMUNI CAKACAKA TIKO ENA WAQA NI SARAVANUA?  

Sa lako tiko oqo nai ka rua ni yabaki ni noqu cakacaka e waqa  

NA CAVA NA NOMUNI ITAVI SE CAKACAKA ENA WAQA NI SARAVANUA? 

Au tiko ena taba ni kena qaravi na kai mua. Ena i tutu vaka assistant crew manager. E umani vata ena tabana ni guests services. Noqui tavi meu vukei ira na kai mua ena vei vakatataro e so kei na nodra flight changes se dau cala na nodra veisaumi.  

Au dau noqu itavi talega meu raica na kena soqoni na vei ivola (documents) donu ka rawa ni ra qai vakatarai mera curu vakacakacaka e waqa. Au tekivu mai ena guest service desk ena yabaki sa oti bera ni biu vei au nai tutu meu qaravi ira kina na ‘crew’ se o ira na kai mua.  

E VICA NA GONE ITAUKEI O NI CAKACAKAVATA TIKO?  

Ena waqa au tiko kina qo, keitou via lewe 13 tiko na gone ni Viti  

E VAKA E VEI NA BALAVU NI NOMUNI SOKO? 

Keimami cakacaka ena vei ono na vula ka keimami vakacagicagi ena rua na vula. Oti na rua na vula na vacagicagai keimami sa dau lesu mai kina neimami tirivu tarava. 

To read more, click on this link to access the full article and details: https://eedition.fijisun.com.fj/subscriptionplans 

Story By: salaseini.guniyaga@fijisun.com.fj