Vakaraitaka ko Josefa Mateitoga ni kevaka e tiko na yalo ni vosota e na taladrodro sasaga kei na veika e gadrevi tu me na rawati.  

E na gauna oqo e sa katolu tiko ni nona yabaki vakavuli ka cakava tiko nona koroi ena ‘Urban and Regional Planning’ ena Fiji National University e Samabula.  

Esa walu na yabaki na nona veikoti tiko mai ena vuku ni vaqara ilavo me veivuke vua kei rau na nona itubutubu.  

E yabaki 22 ko Josefa ka cavutu mai ena koro o Mualevu mai Vanuabalavu, ka qase duadua vei iratou na va na veitacini.  

E kaya ni dau taleitaka vakalevu na veikoti e na gauna e se lailai kina ka tekivu mai e na yabaki 2015 e na gauna e kalasi walu kina.  

Vuli mai Mualevu Primary School ka dewa yani e Adi Maopa Secondary School e Vanuabalavu mai na fomu tolu kina vitu ka lako mai ki Suva me mai qarava vakatabakidua kina nona vuli. 

Tomana ka kaya ni rau nona i tubutubu e rau tiko ga mai nakoro e na gauna oqo ka rau teitei ka volivolitaki me bula kina na matavuvale. Ia e na gauna oqo e sa veivuke sara vakalevu na veika e rawata mai e na nona dau veikoti voli e koronivuli ka vakakina e na veivanu tale e so.  

E Vakaraitaka ni gauna e tekivu kina na nona veikoti e sotava sara e levu na dredre me vaka na kena dau vakaqarai e so na lewenivanua me ra koti ka vaka kina na kena dredre ni vakasaqarai e so na gacagaca ni veikoti.  

E kaya ni tekivu veikoti voli mai e na ‘trimmer’ mai nakoro ka oqo sa toki sara kina misini livaliva ni veikoti.  

E tomana ka kaya ni bisinisi oqo e na nona taudua saraga ka sa toso vinaka sara tiko e na gauna oqo ka cakava talega e dua na nona vanua ni veitaratara e na volamata ka vakatokai tiko me ‘ Joe The Groomer Fiji’ me rawa ni veitaratara yani kina na lewenivanua kevaka e ra vinakata mera koti.  

E vakaraitaka ni levu na dredre e sotava e na kena sagai me veiraurauvata na vuli kei na kena cicivaki na nona bisinisi ka sa gadreva ga kina me da tu vakatagane me dau vosota na veidredre kece e sotavi.  

E kaya ni levu na gauna e dau veikoti ena so na vale ni veikoti e Suva ka vaka kina e na bure ni gonevuli mai Samabula.  

E tomana ni lavo e rawata mai e dau vakauta sara ki nakoro ka me veivuke vei rau na nona i tubutubu e na kena qaravi na vuvale ka vaka kina vei iratou na tacina se vuli tiko mai nakoro e na gauna oqo.  

E dau vakasalataki koya na nona tubututu me dau vosota na veidredre kece e sotava, rawata na nona vuli ka me vukei iratou na tacina e ratou muri tiko mai ka usutu e na kena qaravi na Kalou e na veisiga.  

Veivakasalataki tiko o Josefa vei ira na tabagone me ra tovolea me ra dau vosota na veika kece e ra lako curuma ka me ra kakua ni tamata sorosoro rawarawa ka me vakaliuci tikoga na Kalou e na veisiga me rawa ni taladrodro vinaka kina na kena qaravi na itavi. 

Story By: Salaseini Guniyaga 

Feedback: salaseini.guniyaga@fijisun.com.fj