E vakamamasu tiko kina Matanitu ko Nemaia Salavou me vakatubura nai sau ni tamata cakacaka ena noda vanua.  

A vosa tiko o Nemaia mai na nona vanua ni volivolitaki ena ‘Flea Market’ e Suva, ka kaya ni ra vakila sara vakalevu na cicivaki bisinisi ni sega ni toso vinaka tiko na nodra ivoli, baleta ni sau levu na bula e Viti ka’ra sega sau vinaka na tamata cakacaka.  

Esa yabaki 50 ko Nemaia, ka cavutu mai ena koro ko Nukutocia, Lovoni, Ovalau. E dau cicivaka tu ga nona bisinisi makete e Suva.  

A lesu kina nona koro ena yabaki 2005 me laki qarava na kena vakayagataki na nona qele.  

A teitei ka vakaduri bisinisi ena nona koro ena cicivaki sitoa ni bera ni ravuravu mai na cagilaba o ‘Winston’ ena yabaki 2016, ka valeqa kece na nona i vurevure ni bula, vale,teitei kei na so tale. 

A lesu tale mai ki Suva ena 2017 me mai tekivuna na nona bisinisi, ka a volitaki pinati voli e na kelekele ni basi e Suva, vakacuruma na veivalenivolavola ni matanitu kece, e na kena sagai tikoga me bula na vuvale kei na qaravi vuli ka vakakina e na nona nanamaki me na cakava e dua na nona teveli ni volivolitaki e na ‘Flea Market’ e Suva.  

Levu sara na dredre e sota kaya e na kena mai kama na Flea Market e na yabaki 2020 ka ma ni dewa tale o koya e na volitaki pinati ni vakarusai kece na nona iyau kei na veika e volitaka e na nona makete ni volivolitaki ka vaka kina na kena mai yaco na matetaka na COVID-19 ka mai dredre tale kina na kena toso na bisinisi.  

E tomana ka kaya ni gauna madaga oqo e ra se vakila tikoga na kena vakaleqai na nodra bisinisi, leqa na ilavo, lailai na tamata e ra volivoli ka ni sa levu na makete e tu e na noda vanua ka vaka kina na kena sa tubu na sau ni yaya e na vei sitoa e na noda vanua.  

E tomana ka kaya ni dina ni ra dau kilai tani tu ga na marama e na qaravi ni bisinisi vaka oqo, ia sa vakauqeti koya saraga me qarava na bisinisi oqo ni kila e na qaravi kina na vuli ka vakakina na bula ni vuvale e na veisiga.  

E vakaraitaka ni rau dau voli voivoi mai yanuyanu ena $200 kina $300 dua na taga ka rau qai dau mai talia ga ko watina e vale.  

E ra volitaka na ibe vivivi kevaka e otataki e na vuku ni soqo vakaviti ka dau vakayacori, volitaka tale tikoga na salusalu kei na tekiteki ka ratou cakava ga e vale, tabua, iri kei na rubu.  

E kaya ni veiqito taucoko me vaka na sotasota ni Drua, Deans, Skipper Cup e cakava talega na nona bisinisi ni volivolitaki ka dau volitaka na biukila kei na iviu ni varuru.  

E volitaka tale tikoga na wai vakaviti ka vakatokai tiko me warusi ka kaya tauyautaka e Viti na kena vakayagataki na wai vakaviti oqo me vaka ni wai tiko ni batabata, mosi ni kete, tubu ni dra ka vaka kina na wai ni vakaukauwa yago. Tomana ni dau nona i voli ka dau vakauta i Sigatoka, Nadi kei na veivanua tale e so. E tomana ni dau vakayagataka vakalevu na nodra qase mai Lovoni, Ovalau e na nodra dikeva ga mai e na nodra dau kania tu na manumanu ni veikau na wai oqo.  

E vakaraitaka ni gauna dredre e lako curumi tu oqo e na rawa ni rawata toka ga mai e $200 kina $400 e na dua na macawa. Oqo e sega ni vaka e liu me ra dau tara vale saraga e na ilavo e ra rawata mai e na nodra bisinisi ia e na gauna a yaco mai kina na COVID 19 kina noda vanua e vakaleqa sara vakalevu na veivoli ka vakatalega kina e na kena sa kacabote tu na veivoli e na monalivaliva ka sa sega ni levu e ra lako mai me ra mai veivoli e na noda makete. 

Story By: Salaseini Guniyaga 

Feedback: salaseini.guniyaga@fijisun.com.fj