NATION

Marautaki Na Veiliutaki Nei Bainimarama

Era marautaka vakalevu o ira na lewenivanua mai Tai Vugalei ena kena sa mai dolavi na Vatukarasa Nursing Station.   Era marautaka vakalevu na lewenivanua e na tikina o Tai
09 Aug 2018 10:00
Marautaki Na Veiliutaki Nei Bainimarama
Era musuka tiko na keke ni kena marautaki tiko na kena dolavi na Vatukarasa Nursing Station na turaga na Paraiminisita o Voreqe Banimarama (sote damudamu), ka tomani koya tiko o Ratu Timoci Ranavude (sote karakarawa) na Vunivalu kei Naivakacere, kei ira na gonevuli e na Coloi – Naivakacere Primary School. Veitaba: Wati Talebula

Era marautaka vakalevu o ira na lewenivanua mai Tai Vugalei ena kena sa mai dolavi na Vatukarasa Nursing Station.

 

Era marautaka vakalevu na lewenivanua e na tikina o Tai Vugalei e na yasana o Tailevu, na totoka ni veiliutaki nei Voreqe Bainimarama, na turaga na Paraiminisita ni noda vanua.

E vakaraitaka na Turaga na Vunivalu mai Naivakacere, o Ratu Timoci Ranavude, ni totoka vakaoti na veiliutaki nei Bainimarama.

“Keimami sa mai vakacegu e na vinaka ni nona veiliutaki kei na veivakatorocaketaki e kauta mai veikeimami,” e tukuna o Ratu Timoci. E tukuna talega o Ratu Timoci ni vinakata vakalevu o Viti na veiliutaki nei Bainimarama.

Na mata ni tikina o Tai Vugalei, o Anare Roraduri, e vakaraitaka ki na Siga Vou ni dua na veivakatorocaketaki kei na veivakararamataki vinaka e kauta mai na matanitu na FijiFirst kivei ira na lewenivanua.

Esa kauta mai na matanitu nei Bainimarama na koronivuli, na gaunisala, na wai ni gunu, ka ra sa mai vakadinadinataka, e tukuna o Roraduri, na kena dolavi na valeniwai ka vakatokai na Vatukarasa Nursing Station.

E tukuna talega o Roraduri ni sa dau yawa vei ira na nodra gole ki na dua na valeniwai se valenibula me ra la’ki qaravi kina.

“Eso vei ira na neimami marama bukete, era vakasucu ga ena loma ni lori, se loma ni boto vakaidinicavu, e na nodra cicivaki tiko ki na valenibula se valeniwai,” e tukuna o Roraduri.

“Au rawa ni kaya eke, ni koya e dua na ivakatagedegede ni gauna e sa mai cava e na kena sa mai dola na Vatukarasa Nursing Station.”

Na veidigidigi

E na kena sa vakanamata tiko na noda vanua ki na veidigidigi e na yabaki oqo, e vakaraitaka o Roraduri na dodonu ni tamata e na veidigidigi sa virikoroti e na Yavu ni Vakavulewa ni noda vanua.

Ia, esa veivakasalataki me ra digitaka e dua na matanitu e na kauwaitaka ka rogoca na nodra gagadre na lewenivanua.

“Vei keimami e Tai Vugalei, esa mai rogoci na neimami kerekere ka sa dede na neimami kerea tu mai,” e tukuna o Roraduri.

“Ko Viti e na gadreva vakalevu e dua na dau ni veiliutaki dina, dodonu, ka savasava me na veiliutaki tale ni oti na veidigidigi.”

E vakaraitaka talega o Roraduri ni na veika kece e gadrevi me tiko vua e dua me na veiliutaki e sa tiko vei Bainimarama, ia e sa na qai vakatau kivei ira na dau ni veidigitaki se o cei mera na qai digitaka.

Vinaka na qaravi ni marama

kei ira na gone

E dua na qasenivuli vakacegu, o Sainimili Pena, e sa yabaki 74, ka sa mai vakaitikotiko e Vatukarasa vata kei na nona lewe ni vale, o Josateki Pena Keteca, yabaki 73, mai Mualevu e na yanuyanu o Vanuabalavu, Lau. E mai vakavinavinakataka o Sainimili na veiliutaki vinaka nei Bainimarama ka vakabibi e na nodra kauwaitaki na marama kei na gone e na noda vanua lomani oqo ko Viti.

“Na neimami kauwaitaki na marama kei na gone, e vakaraitaka o qasenivuli vakacegu, e mai vakaukauwataka o Bainimarama ka bulia talega na lawa mera taqomaki vinaka kina.

“Au sa vakavinavinaka vakalevu vei Bainimarama e na nona kauwaitaki keimami na marama kei ira na gone,” e tukuna o Sainimili.

Sa kerekere vakabibi o Sainimili vei ira na turaga me ra vakamuria na iliuliu ni matanitu e na nodra liutaka nai bole ni nodra taqomaki na noda marama kei na gone.

Sega na veivakaduiduitaki

E dua tale na ka e vakaraitaka o Sainimili ni sega vei Bainimarama na veivakaduiduitaki ena nona veiliutaki.

Vei ira era sa veiliutaki oti, e tukuna o Sainimili e dau vakatabakidua na nodra veivuke ki vei ira ga era veikilai. Na veivuke ni matanitu nei Bainimarama e drodrova kece sara na veimata tamata e na noda vanua.E vakaraitaka o Josateki ni maqosa vakaoti na veiliutaki nei Bainimarama kei na nona matanitu.

“E sega kina na veivakaduiduitaki,” e tukuna o Josateki.

“Na mataqali veiliutaki vaka oqo e gadreva na noda vanua, ia e sa na qai vakatau ga kivei ira na lewenivanua ka ra na vakaitavi tiko e na veidigidigi e na yabaki oqo.

“Meda namaka me na digitaki tale e dua na dau ni veiliutaki dina, dodonu ka savasava.”

Feedback: maikab@fijisun.com.fj

Fiji Sun Instagram
Fiji Plus
Subscribe-to-Newspaper
error: