Ematata vakavinaka tu na ka e tukuna tiko na Yavu ni Vakavulewa ni Lotu Wesele e na noda vanua me baleta na lotu kei na politiki.

Vei ira nai Talatala kei na Yada ni Turaga (Dikonesi),  e tukuna na Yavu ni Vakavulewa ke ra via lewena e dua nai soqosoqo vakapolitiki me ra na kerea rawa na nodra vakacegu mai na nodra itutu e na loma ni lotu.

Ni oti oqo, era sa na galala mai na lotu ka ra sa na vakaitavitaki ira e na  rara vakapolitiki.

Na Qase Levu se Peresitedi ni Lotu Wesele e Viti kei Rotuma, o Nai Talatala Epineri Vakadewavosa, sa solia na nona ivakaro kivei ira nai Talatala kei ira na Vada ni Turaga ni kevaka mera via vakaitavi e na politiki ia mera kerea na nodra vakacegu mai na nodra itutu e na loma ni lotu.

Sa koto oqori na veika e tukuna na Yavu Ni Vakavulewa ni Lotu Wesele e Viti kei Rotuma, me baleta a nodra via vakaitavitaki ira e na politiki ko ira nai Talatala se Vada ni Turaga.

E na tabana ka tukuni kina “Na ivakarau kilikili ni veiqaravi e na lotu Wesele e Viti” e na ulutaga na “politiki” e tukuna –

(a) Sa na dau vakacegu mai na nona ilesilesi e dua nai Talatala se Vada ni Turaga (Dikonesi) ni bera na nona tu kina dua na veidigidigi me mata ki na palimedi.

(b) Sa na rawa vua nai Talatala se Vada ni Turaga (Dikonesi) me kerekere kina Komiti ni Leqa se Koniferedi me vakailesilesi tale.

(c) O ira nai liuliu vakalotu mera vakuwai ira mai na vakaitavi e na veivakaukauwataki, tokoni kei na vakadeitaki ni tauri vakaukauwa ni dua na matanitu, era digitaka na lewenivanua.

(d) E dodonu mera vakaitavi na iliuliu vakalotu e na vakadinadinataki ni rokovi ni tamata ni da a buli meda ucuya na Kalou e na nodra vakaraitaki kudru ni buturaki na nodra dodonu na lewenivanua, vakabibi na dodonu ni qaravi Kalou, ni vakasama, kei na soqoni vata.

E sa veivakasalataki na turaga na Qase Levu kivei ira nai Talatala kei na Vada ni Turaga ni lotu ni  na sega vakadua ni tokona na nodra curuma e dua nai soqosoqo vakapolitiki, ni ra  sa cakacaka tiko e na lotu.

Na lotu e tukuna na Qase Levu, e na rawa ni solia na kena veivale ni soqo me vakayagataki vei ira nai soqosoqo vakapolitiki, e na nodra vunau vei ira na lewe ni vanua.

Kivei ira nai Talatala kei na Vada niTuraga, ni ra kerea na nodra vakacegu mai na nodra itutu, e tukuna o Qase Levu, mera sa vakagalalataka talega na nodra itikotiko vakalotu, ka ra qai tekivutaka na nodra bula vakapolitiki.

E vakadeitaka na Qase Levu ni sega ni rawa vei ira mera qarava e rua na cakacaka, ka sa na vinaka ga kina mera kerea na nodra vakacegu.

Me vaka e tukuna tiko na Yavu ni Vakavulewa, ni na rawa kivei ira mera lesu tale mai kina lotu, ia, era na kerekere tale, ka waraka me vakadonui na nodra kerekere.

Feedback:  maikab@fijisun.com.fj