Sunvoice

Digitaki O Natuva Me iLiuliu Ni Bose Ni Yasana O Naitasiri

Sa digitaki o Timoci Lesiki- vatukoula Natuva me sa ili- uliu vou ni Bose ni Yasana o Naitasiri.
31 Jan 2019 16:08
Digitaki O Natuva Me iLiuliu Ni Bose Ni Yasana O Naitasiri
Timoci Natuva

Sa digitaki o Timoci Lesikivatukoula Natuva me sa iliuliu vou ni Bose ni Yasana o Naitasiri.

E vakadeitaka mai oqo kina SigaVou na gusu ni vosa ni Tabacakacaka iTaukei (iTaukei Affairs Board – TAB) o Alipate Natoba.

“Sa mai taura nona ivola ni nona ilesilesi ena macawa sa oti na turaga Minisita vakacegu o Timoci Natuva mera sa iliuliu ni Matabose ni Yasana o Naitasiri,” e tukuna o Natoba.

A taura tu na itutu oqo o Alivereti Nabulivou, ia e sa kerea na nona vakacegu mai nai to vakapolitiki ka veiliutaki tiko ena gauna oqo na FijiFirst, ni a sega ni digitaki me dua o koya na mata vakaturi ena veidigidigi sa oti. E sa lewena tiko na soqosoqo vakapolitiki na Unity Fiji ena gauna oqo.

Ena 2014, e a rawata o Natuva e dua na idabedabe ni FijiFirst ka digitaki sara me Minisita ni Veitaqomaki kei na Curu Vanua (Minister for National Security and Defence and Immigration) ena vula o Seviteba.

Ena Okosita ni 2016 era sa kerea na nodra vakacegu ni ra sa vinakata mera laki tu vata ga kei na nodra matavuvale. E a sosomitaki ira o Howard Politini.

O Natuva, e dua na Kanala vakacegu mai na Mataivalu ni Viti (Republic of Fiji Military Forces – RFMF). E a laki vuli ena Deakin University mai Ositerelia ka rawata mai kina na koroi cecere na Master of Arts in Strategic Studies.

Mai na 1989–1990, e a veiliutaki tiko vei iratou na 2FIR mai Sainiai. Era taura na itutu vaka Chief Operations Officer Civil Military Affairs ena United Nations Transitional Administration mai East Timor mai na 1992 -1993, taura na itutu vaka Military Advisor vua na UN Secretary General mai Afghanistan kei Pakistan.

Ena 2001, era a taura na itutu vaka Chief-of-Staff ni United Nations Interim Force in Lebanon (UNIFIL).

Ena 2007 era a digitaki mera Contingent Commander ni First Fiji Infantry Regiment, Fiji Guard Unit ni United Nations Assistance Mission in Iraq (UNAMI).

Era a vuli mai na koronivuili e Sawani koro ka laki tosoya sara ki na Lelean Memorial School.

Ko Natuva, e a vuli talega mai na Royal Australian Naval College, Asia Pacific Centre for Security Studies mai Honolulu, Naval kei na Post Graduate School e Monterey, California. E lewena talega na Fellow of the Australian Defence College of Strategic Studies mai Canberra, Australia.

Ena gauna oqo era tiko ena Minisitiri ni Veitaqomaki.

E saga na Siga Vou me veivosaki kei ira ia era tiko vakacakacaka mai valagi ena gauna oqo.

Na imatai ni bose ni yasana o Naitasiri ena yabaki oqo, ena vakayacori mai Vuidawa mai nai ka 18 – 19 ni Evereli.

Eratou vakaraitaka mai na Tabacakacaka iTaukei ni na rawa ni na veisau na tiki ni siga kevaka ena gadreva na iliuliu ni matabose.

Feedback: maikab@fijisun.com.fj

Subscribe to E-Edition
Vodafone-giga-plan
GSMA
Subscribe-to-Newspaper
Fiji Sun Instagram
Subscribe-to-Newspaper
error: