Siga Vou

Me Tara Na Valenivolavola Ni Yasana E Savusavu

Evakaraitaka na jemeni ni Bose ni Yasana o Cakaudrove, o Ratu Jekesoni Yavalanavanua ni sa bera ni vakadeitaki tiko na imatai ni bose ena yabaki oqo.
31 Jan 2019 16:20
Me Tara Na Valenivolavola Ni Yasana E Savusavu

Evakaraitaka na jemeni ni Bose ni Yasana o Cakaudrove, o Ratu Jekesoni Yavalanavanua ni sa bera ni vakadeitaki tiko na imatai ni bose ena yabaki oqo.

Na bose, e tukuna ni na vakayacori ena Maji se Evereli ka na qai vakadeitaki vakamalua na vula kei na tiki ni siga.

Ni taroga na Siga Vou se cava na ituvatuva eratou na gadreva me sagai, e tukuna me sa na tara tale na valenivolavola ni yasana e Savusavu.

Na Valenivolavola ni Yasana

Na valenivolavola ni yasana, e tukuna, e a kama ena vula ko Jiune ena 2017.

Eratou na kerekere ki na Valenivolavola ni Paraiminisita (Office of the Prime Minister – OPM) ke rawa ni na veivuke vakailavo ena kena tara.

Ena gauna oqo, e tukuna ni ko ira na cakacaka ena valenivolavola ni yasana era vakayagataka tikoga e dua na rumu ka sa lailai kivei ira.

Na Bose

Sa na laki vakayacori na imatai ni bose ena na koro vakaturaga o Saqani e Cakaudrove.

Na iotioti ni bose ni yasana ena yabaki sa oti, e tukuna, ni a vakayacori mai Somosomo, Taveuni, ka vakadonui kina nai tuvatuva vakailavo ni bose ni yasana ena 2019 – 2020.

Na Qele

Ena bose talega oqo, e vakarai- taka kina vei ira na lewe ni bose na kena sa lutu na bulabula ni qele e Taveuni, ka ra sega ni rawata na nodra takete ni dalo volitaki ko ira na dau teitei.

Na tikina oqo, e sa soli kivei iratou na Tabana ni Teitei me ratou dikeva, ka ratou tukuna me sa vakacegui na qele baleta ni sa oca.

Na Vakabulabula ni Qele

E dua talega na ka e sa oti kina na bulabula ni qele, sai kovya na kena vakayagataki nai vakabulabula ni qele e voli mai.

Sa veivakasalataki na Tabana ni Teitei ena tikina oqo me sa cegu na vakayagataki ni vakabulabula ni qele e voli mai na sitoa ka vayagataki na deni manumanu.

Na bose talega e Saqani, ena tuvani kina na ituvatuva ni otioti ni bose ena yabaki oqo ka na vakayacori e Suva.

Feedback: maikab@fijisun.com.fj

Subscribe to E-Edition
china daily
SPSE
Subscribe-to-Newspaper
Fiji Sun Instagram
Subscribe-to-Newspaper
error: