Era sa cakacaka vakaukauwa mai Ucunivanua, Verata, Tailevu, ena kena vakadodoki na paipo ni wai, me yaco ki na koro ni sa bera ni ra qarava na Bose ni Yasana o Tailevu ena vula o Veverueri.

E tukuna mai ki na Siga Vou na turaganikoro o Ratu Sevanaia Verata, ni ra sa tekivuna na nodra vakarautaka na Bose ni Yasana ia era na gadreva vakalevu na wai me yaco ki na koro ni sa bera na bose.

E dau leqa na wai e Ucunivanua, ia e sega ni dua na matanitu e saga na kena cakacakataki. E tukuna o Ratu Sevanaia, ni a raica na leqa ni wai na Turaga Paraiminisita o Voreqe Bainimarama ka vakauta yani na sovea me sa dua na so ni wai vinaka.

Na leqa ni wai e Ucunivanua e sa na oti ni sa na dola na paipo ena koro.

Tei e 4000 na yaqona

Sa tei oti e 4000 na yaqona ena 36 na iteitei mai Lomaji, Matuku, Lau. Era sa lako tale ki Moala me laki voli tale mai kina eso na nodra itei.

Na tei yaqona oqo, e sa tiko na kena vakatatabu ka sa masulaki talega.

Na porokaramu ni tei yaqona oqo e cakacaka vata kina na vanua, lotu kei na matanitu ka tolu na yabaki na kena dede.

E nodra takete ena dua na yabaki me tei e 450 na buke yaqona ena dua na iteitei.

Vakabulabulataki na tei raisi e Rewa

Sa na saga na Tabana ni Teitei me na vakabulabulataka na tei raisi ena vanua bucabuca e Rewa.

E levu era sa tei raisi tiko, ia sa gadrevi me tei vakalevu me qai bisinisitaki. Sa laurai ni levu na qele vinaka ni raisi era lala tu. Era sa solia talega na nodra veitokoni na iTaukei ni qele.

Vakatarogi na lako ki Mereke

Era sa vakatataro tiko ko ira na lewenivanua era sa vakadouya mera na lako ki cakacaka ki Mereke, ena veivosaki e vakayacora tiko e dua na marama, se gauna cava era na qai lako kina.

Era sa solia na nodra pasipote kei na so na ilavo. Sa vakasalataki ira na Minisita ni Cakacaka o Parveen Bala mera kua ni vakarorogo kina baleta ni sa tiko na nona kisi ena valeniveilewai ena nona lasutaki ra tiko na lewenivanua.

Na lako ki cakacaka ki Mereke ena sega ka sa tiko ena ligadratou na ovisa ena gauna oqo na marama ka liutaka tiko nai lawalawa kara vunau wavoki tiko oqo.

Ena rua na macawa sa oti era a tiko mai Taveuni.