Sa mai ciqoma ena yalo ma­rau o Samisoni Tuilawaki, na ivola ni nona sa digitaki me sa jemeni ni Bose ni Yasana o Namosi.

O Tuilawaki e sosomitaki Ratu Romanu Matanitobua ka leqa ena Okotova ni yabaki sa oti, ni oti e dua na nodra tauvimate lekaleka.

O Ratu Romanu e tacidra Gone Turaga Vunivalu na Tui Namosi, o Ratu Suliano Matanitobua, ka rau vasu ki Korolevu ena vanua o Noikoro e Nadroga/ Navosa.

Vakacakacaka, era veiqaravi tiko vakailiuliu ni Matabose ni Yasana e Namosi rauta ni sivia e tini na yabaki, me yacova na nodra mai vakacegu. Era a lewe tale tu ga ni Bose Levu Vakaturaga (BLV) ena dua na gauna.

E tukuna o Tuilawaki e dua tale­ga ka sa vakacegu mai na caka­caka vakamatanitu, ni na dredre na nona sosomitaki Ratu Romanu ka oqo e dua na bolabole kivua.

Na bose ni yasana e tukuna o Tuilawaki ni sa bera ni vakadeitaki na kena tiki ni siga, ia ena vakayacori ga ena vale ni yasana ka vaka­tokai tiko na Ro Ku­rudu­adua Hall ka tikoga e Na­vua .

E tukuna o Tuilawaki ni sa vaka­donui nai tuvatuva ni lavo (Budg­et) ni yabaki 2019 kina 2020 ena yabaki sa oti.

Nai matai ni bose ena yabaki oqo e vakadeitaka na jemeni vou ena vakatabakidua sara ga kina kani vei­vakatorocaketaki ena loma ni yasana.

Ko Tuilawaki edua tiko vei iratou na lewe ono (6) na mata sureti ena Bose ni Yasana ka wili talega kina o Seru­pepeli Udre, Vitale Varo, Seveci Roko­takala, Maciu Katamotu kei Lasaro Vota.

E jemeni tale­ga tikoga ni Kabani ni Na­mosi.

Sa nuitaka tu na jemeni vou ni ra na veitokoni vua na lewe ni bose, ka na dua na yabaki vinaka kina yasana o Namosi na yabaki 2019.

Feedback: maikab@fijisun.com.fj