Ena Bose ni Yasana o Ra ena lotulevu mai Nanukuloa, ena veivosakitaki ga kina na veika vakailavo.

Na itukutuku oqo e vakadeitaka mai ki na Siga Vou na Roko Tui Ra o Paula Delaivuna.

“Na bose oqo ena bose ga ni ila­vo,” e tukuna na Roko Tui Ra.

Oqo talega e sa qai matai ni nona bose me vaka ni a Roko Tui Lau mai ena vica na yabaki.

O koya talega e dua vei rau na Roko ka wili kina o Mosese Na­koroi, e lesi ena veilesi ni Tabana iTaukei ena mua ni yabaki sa oti. E lesi o Nakoroi mai Ra ki Tailevu ka lesi o Deivuna mai Lau ki Ra.

Na Bose ni Yasana o Ra esa qai karua ni bose ni yasana ena ya­baki oqo ka kena imatai na Bose ni Yasana o Nadroga/Navosa, ka vakayacori ena vula ko Janueri mai na koro o Nasigatoka. E tuku­na o Roko Tui ni na veivosakitaki mada e liu na ituvatuva ni lavo ni 2019 – 2020.

Na ilavo, e dua na kena iwase e tukuna e gole ki na Valenivolavola ni Yasana (Provincial Council Of­fice). Oqo ena wili kina na kedra isau ko ira era cakacaka kina, na kena vo ena gole ena cakacaka ni veiqaravi e vakayacora na va­lenivolavola.

E dua talega na kena iwase e gole ki na veivakatorocaketaki ena loma ni (awards) yasana. Na matanitu, e tukuna, ena gadreva me vakamatatataki na veika e va­kayagataki.

Ni na oti na kena veivosakitaki, e tukuna o Delaivuna, era sa qai veivosakitaka na ituvatuva ni lavo ni yabaki 2021 – 2022.

Ena bose bibi, ka ra na gadrevi kina na lewe ni bose mera soli vakasama, ena kena vakayagataki vakamaqosa na ilavo me laveti cake kina na bula ni lewenivanua.

Na bose, e vakadeitaka mai na Roko Tui Ra, ni na siga dua ga.

Feedback: maikab@fijisun.com.fj