Sa tekivutaka na Tabacakaca­ka iTaukei na nodra vuli na sausauvou ena noda vanua.

Ena Noveba ni yabaki 2017, sa tekivutaki na vuli qo vei ira na isausauvou ni Yasana o Tailevu kei Rewa.

E nai ka 3 ni Seviteba 2018, sa tekivu na ikarua ni wasewase ni vuli vei ira na isausauvou ni Yasana o Ba.

Era sa mai vakarautaki ena ko­ronivuli e Nadave. Na vuli oqo e kena inaki levu duadua mera va­kararamataki na sucuturaga ena veivuvale veiliutaki vakavanua kei ira na sauturaga ena noda vei­delaniyavu ena bibi ni kena maro­roi tiko na veitikotiko vakaturaga, ka yavutaki ena veiliutaki vinaka ka matau.

Ena imatai ni rua na macawa sa mai cava ena Vakarauwai (15/09/2018), era a vakararamata­ki na iSausauvou sa digitaki mai ena veivanua turaga ni Yasana o Ba ena ulutaga ni Vanua kei na iTovo Kei Na Vosa.

E soli mera vakacagicagi mera lesu ki na nodra veidelaniyavu, mera la’ki vakadidiketaka na vei tikinibula kece vakavanua era rawa ni la’ki vakabula kina na vanua, vakayavutaki ena ulutaga e rua e vulici ena loma ni imatai ni macawa.

Ena dua na veitalanoa kei na iVukevuke ni Vunivola Tudei ni Tabacakacaka iTaukei o Saimoni Waibuta, e tukuna kina ni nodra vuli na isausauvou e tiko ga kina ko ira na dra turaga ka ra na veil­iutaki mai muri.

E tukuni kivei ira na nodra itavi ki na lewe ni yavusa.

Na vuli talega oqo, e tukuna, ena tarovi kina na kena dau veibataki na itutu vakaturaga.

Ni sa mai cava na vuli oqo, ena gauna oqo e sa qarava tiko na Ta­bacakacaka iTaukei na porokara­mu ni `Veivakararamataki’ ka sa tekivutaki ena yasana vakaturaga o Serua ena yanuyanu o Serua.

Na vuli oqo e kerei kivei iratou na Tabacakacaka iTaukei mai vei ira era gadreva.

Mai Serua era a marautaka sara vakalevu na veika e cauraki kina.

Feedback: maikab@fijisun.com.fj