Siga Vou

Cakacaka vakaukauwa na yavu eda na rawata kina na bula sautu, marau

Nida veivosakitaka na bula vakayago e wili kece kina na ka eda cakava meda bula sautu, marau kei na vakacegu.
26 Sep 2021 12:25

Ena macawa sa oti eda a veitalanoa­taka ni tiko ga e ligada na kaukauwa meda vorata na dravudravua.

Na vosa oqo na dravudravua e vakatau ena noda vakayagataka eso nai vakat­agedegede meda rawa nida vakarau­taka. Dau caka kina na vakadidike me laurai eda dravudravua se sega.

Nai vakarau oqo era kauta mai na vu­lagi mai vavalagi ka se tekivu mai ena gauna ni bula vakoloni.

Ena noda bula nai iTaukei e nakoro, ke dua e levu tu nona i teitei eda kaya ni sautu. Ke sega e dravudravua. O ira na vulagi era kauta mai nai lavo, sa mai veisautaka na noda rai baleta na bula sautu kei na dravudravua.

Esa veisau na gauna ka veisau talega na rai kei nai vakarau ni bula. Esa do­donu talega meda veisau ka toso vata kei na gauna.

Ia, dua ga na ka na vakasama me bale­ta na cakacaka vakaukauwa e dua tuga ka sega ni veisau. E vakadei ni noda bula ena gauna sa oti me yacova mai na gauna eda donumaka tiko oqo kei na gauna e tu mai liu.

Na cakacaka na ka vakalou me vaka a kaya na qase o Jemesa ena i Vola Tabu, Veiyalayalati Vou, Jemesa wase 2 tikina 14-26. Na vakabauta ke sega na cakaca­ka e ka mate. Baleta nida lotu vakarisi­to e dodonu me noda yavu ni bula oqo. Na bula sautu kei na bula dravudravua e sega ni ka vakayago ga, e ka vakayalo talega. O rau oqo e rau sala vata. BULA VAKAYAGO

Ena i vakatekivu, ena were ko Iteni, ea vakaroti rau o Atama kei Ivi na Kalou me rau na kana mai na buno ni yadre drau. E na vei taba tamata me yacovi keda mai edai, nai vakaro oqo e sega ni veisau. O koya ga e cakacaka vakau­kauwa ena bula sautu. Nai vakaro oqo e soli vei keda kece na tamata eda sucu mai ena vuravura oqo, veitalia ga na kawa tamata eda lewena se mata lotu eda curuma. Na Kalou e sega ni vaka­duiduitaki keda baleta nida luvena kece kina vakayalo. O koya a buli keda kada cegu ka bula tiko kina baleta na yalo e solia vei keda me tekivu mai na noda kunekunetaki me yacova sara na gauna eda na mate kina. Na mate e dau yaco ni rau sa veikalikali na yago kei na yalo. Na yago na suka kina qele, na yalo sa toso kina vuravura ni yalo sa vakarau­taka na Kalou.

Nida veivosakitaka na bula vakayago e wili kece kina na ka eda cakava meda bula sautu, marau kei na vakacegu.

Dua nai solisoli levu e solia vei keda na Kalou na galala ni digidigi (freedom of choice). E dina ni sa solia mai nai va­karo (commandments) na Kalou ia sa vakatau vei keda meda muria se sega. Keda muria eda na kune kalougata kina. Ke sega eda na kune rarawa.

Na cakacaka vakaukauwa e tiki ni noda bula vakayago. Nida vakayaga­taka na noda qele vakavinaka eda rawa ni kana mai kina. Kena vo (surplus) e rawa ni volitaki me rawa mai kina na sede me voli kina na vei yaya mai na sitoa, saumi ni livaliva

kei na wai kei na veika tale eso.

E bini tu na qele e sega tu ni vakaya­gataki ena 14 na yasana. Keda teivaka, caka binisini kina eda rawa ni vutuni­yau. Tukuni ga nida taukena e 91 na pa­sede na qele taucoko e Viti. Ia, eda drav­udravua tikoga vakailavo. Meda tarogi keda vata kei ira na noda i liuliu na cava na vuna. E rawa nida veisautaka na roka oqo kevaka eda duavata meda cakacakataka na noda qele.

Ena macawa sa oti eda a veitalanoata­ka na bibi ni vuli vei keda nai iTaukei. Kevaka eda sega ni cakacakataka ena dredre vei ira na noda gone mera ya­cova na vuli toro cake. Ena gadrevi na noda veitokoni ena veigacagaca kece sara ni vuli. Nida tokoni ira na luveda eda na vakauqeti ira mera cakacaka ka vuli lesoni vakaukauwa mera rawata na nodra vuli.

Eso na gauna na noda veivakavulici e vale e sega ni sala vata kei na noda vakaraitaki. Eso vei keda sa liu tiko na vei oga vakavanua se vakalotu qai muri na vuli. Na vosa ni Vola Tabu e sega ni cala. Tekivu mada mai Jeruisalemi. Kena i balebale tekivu mada mai vale. Ke sa vinaka tiko mai vale ena qai lai vinaka na lotu kei na vanua. Na i tavi ni vanua kei na lotu me taqomaka ka ma­roroya na matavuvale.

Na tamata dau cakacaka e sega ni dua na ka e madualaka se rerevaka baleta ni vakayacora tiko na loma ni Kalou. Na Kalou e vinakata meda tubu vakayago kei na vakayalo. E veimecaki vata kei na vucesa, vakasavuliga, vakasabusa­bu, vakaveitalia kei na talaidredre. BULA VAKAYALO

Kevaka eda na via bula vata na Ka­lou i lomalagi ni oti na bula oqo eda na cakacakataka. Na bula ni cakacaka e sema kina bula vakayalo. Ni o qarava na nomu matavuvale ena i vakaitage­degede sara i cake o sa cakava tiko na lomana na Kalou. Na cakacaka levu taudua o rawa ni cakava e na bula oqo na nomu qarava na nomu matavuvale. Na vei sausau kei nai rogorogo o rawata mai tuba vakacakacaka se vakavuli ena sega ni rawa ni sosomitaka na leqa ni nomu matavuvale baleta na gogo ni nomu veiqaravi.

Oqo na vuna. Na matavuvale era susu kina nai solisoli ni Kalou. Wilika na Maciu wase 18 tikina e 6 ena Veiya­layalati Vou ena I Vola Tabu na bibi ni vakasama oqo. Na noda i tavi nai tubu­tubu meda qaravi ira na luveda. Meda vakani ira, vakaisulutaki ira, vakavu­lici ira, taqomaki ira ka lomani ira.

Oqo e vakadeitaka na noda bula vakay­alo. Meda dau lomani ira na dravudra­vua, malumalumu, na qase, tauvimate kei ira na vakaloloma. Ni tu vei keda na ka e rawa ni da wasea vei ira.

Me tiko talega vei keda na yalo malu­malumu meda rawa ni vosoti ira na keda meca kara caka ca vei keda. Oqo ena kauta laivi na dravudravua ni bula vakayalo.



Five Square diwali dhamaka 2021


Get updates from the Fiji Sun, handpicked and delivered to your inbox.


By entering your email address you're giving us permission to send you news and offers. You can opt-out at any time.


Tower Insurance
FNPF
Covid 19 - SPC
Fiji Sun Instagram
Subscribe-to-Newspaper