Na vakatulewa sa mai tauca na kaban ni waqa na Goundar Shipping Limited ena vakatubu leqa ena yasana ko Lau.

Sa vakaraitaka oti na kabani ena nona ‘Facebook’ ni sa na cegu mai ena cici e dau veivuke kina vakailavo na matanitu (franchise trips) kei na nona cici ga vakataki koya.

E vakaraitaka talega kina tabana ni vola itukutuku ena rua na yabaki sa oti na lusi ni kabani e $5 na milioni, ka vuna levu na tosocake ni sau ni waiwai kei na so tale na ka.

Nai liuliu ni Bose ni Yasana ko Lau o Alipate Naiorosui.

Na nona lako ki Yasayasa Moala e solia na matanitu e $11,000, e soli e $18,000 ena lako kina vualiku kei Lau ka soli e $25,000 ena lako ki Rotuma.

Ia na ka e vakayagataka e 14,000 kina 15, 000 na lita na waiwai ena lako kina Yasayasa Moala, ka sau walega ni waiwai ena tirivu oqo ena rauta e $45,000 na dola.

Na veivuke ni matanitu se franchise sa na mai cava ena mua ni vula ko Jiune ka na dikeva tale na matanitu. Kevaka ena sega ni tosoya cake na veivuke, e tukuna ni sa na sega ni dua na betena na nona veiqaravi.

E vakaraitaka nai liuliu ni Bose ni Yasana ko Lau o Alipate Naiorosui ni dodonu me raici ka wali sara vakatotolo na lewa sa mai vakatauca oqo ko Goundar.

Ko ira na vakabisinisi e tukuna era via rawa tubu talega ka rawa ni vakavuna na lewa oqo na kena tubu na isau ni waiwai.

Kevaka e sa na vakatuburi nai vodovodo, e tukuna o Naiorosui ni na dredre na nodra vaqara ilavo na lewe ni vanua.

Ko ira na lewe ni yasana ko Lau ka ra tu e vanua era na sotava na leqa, vakabibi ni sa na sega nai yaya ni sitoa kei na so tale nai yaya e kau yani e Suva era dau vinakata ena nodra bula ena veisiga.

E levu era lako mai ena Bose ni Yasana era sa tu oqo e Suva ka sa na leqa na nodra lesu tale.

Sa dodonu kina me walia sara vakatotolo na veika e vinakata ko Goundar.

Na veiqaravi ni wawa ena qai tekivu tale sa na lutu nai sau ni waiwai.

Na lewa sa mai vakadavori oqo era na vakaleqai kina mai na Vualiku kei Lau (Northern Lau), Yasayasa Moala kei Rotuma.

Sa kerea na matabose ni Yasana ko Lau me dua nai wali totolo ni vakatulewa sa mai tauca na kabani ni waqa na Goundar Shipping Limited baleta na leqa era na sotava ko ira na tu e delaniyavu.

Feedback: maikab@fijisun.com.fj