Esa qai rogoci na nodra tagi na leweniva­nua ena Tikina ko Udu mai na yasana ko Macuata ena kena sa yaco yani vei ira na gaunisala.

Oqo e dua na veivakatoroicaketaki era tag­ica makawa tu mai kina Matanitu era sa sivi yani, ka sega ni dau tauri vakabibi.

E 11 na Tikina e tiko ena yasana ko Macu­ata, ka dua vei ira na Tikina ko Mudu.

Tukuna na mata ni Tikina ko Udu, Ai­sake Galodamu, ni sa mai vakavotukana na nodra tagi kei na sasaga ena veiliutaki ni Matanitu na FijiFirst.

E lima na koro e tiko ena Tikina ko Udu. Ena gauna e liu e dau dredre na veilakoyaki ni sega na gaunisala, e tukuna ko Aisake ni levu na lewenivanua era biuta mai na nodra veikoro me ra gole voleka mai ena vei koro lelevu ena vuku ni sasaga vakavuli kei na cakacaka.

Tomana ko Aisake na dredre era lako cu­ruma mai ena gauna oya, era dau vodo boto se ra taubale me ra yaco kina vanua e tiko kina na gaunisala ka me ra sasaga sara yani ki koronivuli se kina taoni.

Esa yabaki ono nikua nona taura tiko na itutu oqo ko Aisake, ka tukuna ni dua na vakacegu levu vei ira na kena sa yaco yani na gaunisala.

Mai na Tikina ko Udu me gole kina taoni ko Labasa, e dau va na aua.

VEIVAKATOROICAKETAKI

“Keimami marau ka vakavinavinakataka na iliuliu ni matanitu o Voreqe Bainimara­ma ena nona dau rogoca na tagi ni leweniva­nua ka vakayacora na veika keimami tagica tu.”

Tukuna ko Aisake ni yaco yani na Tikina ko Udu na gaunisala ena yabaki 2019. Ena yabaki vata tiko ga koya ea yaco talega yani kina ena loma ni tikina na veiqaravi ni basi me veivakaleleci me yaco kina taoni ko La­basa.

“Oqo e dua na veivakatoroicaketaki levu keimami sa raica ka vakadinadinataka.”

E kaya na Tikina ko Udu, e toka donuya tiko na ‘International Dateline’.

“Na kena sa yacovi keimami na gaunisala e sana kauta vakavoleka mai ena loma ni tikina na veivakatoroicaketaki lelevu.”

Na gaunisala e tukuna e yaco tiko ena matai ni koro ko Cawaro.

“Keimami kerekere kina matanitu ke rawa ni sagai na gaunisala me yaco kina ikarua ni koro ko Nukusa.”

E kaya ko Aisake ni levu na veivuke ni matanitu ka dau soli tiko era sega sara ni dau vakayagataka vina­ka, baleta tiko ga na leqa ni gaunisala e dau tarai ira tu.

Ia, nikua e kaya era sana rawa ni qai lakova vakara­warawa na veitabana ni matanitu ni sa tiko na gaunis­ala.

Ena Bose ni Yasana ko Macuata ka vakayacori mai na koro ko Vunivutu ena siga Vukelulu sa oti, e kaya ni ra marautaka na nona gole yani ko Bainimarama ka veitalanoa vata kei ira na lewenivanua.

Feedback : lusiana.tuimaisala@fijisun.com.fj