Na Salala, e dua na mataqali ika ka dau cabe ga vakadua ena veiya­baki.

E vakaraitaka mai kina Siga Rarama ko Tiko Buli, nai liuliu ni Mataqali e Votua, ni levu duadua nai wiliwili ni Salala e tagavi rawa ena yabaki oqo me vakatautauva­tani ena vei yabaki sa sivi yani.

Na mataqali o Votua e nodra mataqali na Gonedau.

E nodra itavi vakavanua na Gone­dau me ra vakarautaka na vei­mataqali sasalu ni waitui me kena na turaga ena gauna ni solevu se soqo, me vaka na veibuli ni turaga, na bose vakoro, se me kena icoi ni kakana ena veisiga.

Ia, vei ira mai Cakova, na cabe ni Salala e ka ni veivakalougatataki vei ira, baleta ni ra a vakaitavi­taki ira tiko na lewenikoro ena kena tara na vale cakacaka ni lotu Wesele ena yabaki oqo.

Tukuna ko Buli, ni oti na nodra bose va koro ena siga Moniti ena macawa sa oti, era sa gole sara na cauravou me ra laki veitomani kivei ira na marama era sa vakarau tu ena kena laki tagavi na Salala mai na nodra baravi.

E tiko nai vakarau vakavanua e dau vakayacori ena gauna e dau tagavi kina na Salala.

IMATAI NI TAGAVI NI SALALA

E dau qarauni vakavinaka na im­atai ni kena tagavi na Salala, e dau vakayacori kina e vica na ivakarau:

•  Ni tagavi oti ga na Salala, esa na kau sara vakadodonu ki na vale nei liuliu ni Mataqali o Votua e na koro o Cakova;
•  E sa na votai na kena na Turaga na Tui Cakova, ka ra na vakaivota­vota talega kina o ira era tiko vaka­cakacaka vaka matanitu ena loma ni koro, kei ira na lewenikoro;
•  E na sega ni veisoliyaki kina vei koro tale eso;
•  Ena sega ni tavuteke, ka na sega talega ni vari;
•  Ena dau vakalutumi toka e rua na ika me na dau bulu me vaka na kena ivakarau.

Tukuna ko Buli ena dau vakalu­tumi toka e rua na ika me qai dau lai bulu.

E kaya ena gauna e vakarau bulu kina, ena tuvani na kedrau ituvatu­va me rau na qara cake ki vanua. Oqo ena vakabauta vei ira ni na cabe tale na Salala ena yabaki ka tarava.

“Nai vakarau oqo era se vakaya­cora mai ko ira na tukaqu kei na tamaqu ka’u sa mai tomana oqo ko au me yacova tiko mai nikua,” e kaya o Buli.

Na ikarua ni kena dau tagavi na Salala, era sa na qai veiwaseyaki kina veikoro ka rawa talega me ra varia ka tavuteketaka na ika.

WILIWILI NI SALALA

E vakaraitaka ko Buli ni ra tagava rawa e 900 na Salala ena imatai ni siga, 600 era ikarua ni siga, 1000 vakacaca na ikatolu ni tagavi, ka ra mai tagava rawa e 200 ena kena ikava ni siga ena Tusiti ena ma­cawa oqo.

“Au nanuma rawa niu a se vuli tiko, ni dau tagavi na Salala ni se bula donuya na turaga na tamaqu, e dau tagavi ga vaka dua ena dua na yabaki. Ia, ena yabaki oqo, kei­mami sa mai tagava sara vaka va, ka veitarataravi.”

Feedback: ray@fijisun.com.fj