Siga Vou | Sigararama

Maravu Na Soko Ni Dei Ena Lotu

E sega ni dua na ka e dredre vua na tamata, kevaka eda sema vakataucoko vei koya na dau ni veibuli.
02 Oct 2022 14:38
Maravu Na Soko Ni Dei Ena Lotu
Ko Atunaisa Seruitamana kei na marama watina ko Seruwaia.

E sega ni dua na ka e dredre vua na tamata, kevaka eda sema vakataucoko vei koya na dau ni veibuli.

Oqo na mala ni nona vosa o Atu­naisa Taleasiga Seruitamana, e dua na noda gone iTaukei ka soko voli tiko ena waqa ni container na ‘MV Papuan Chief,’ ka taura tiko na itutu vaka ‘Ordinary Seaman’.

Na cakacaka ni ‘Ordinary Sea­man’ sai koya e liga ni veivuke vei bosoni ena nona raica me tuvaki ka samaki vakavinaka na waqa.

Ko Atunaisa Seruitamana ena gauna e vakaleleca tiko kina na waqa ni saravanua na South Sea Cruises

Ko Atunaisa Seruitamana ena gauna e vakaleleca tiko kina na waqa ni saravanua na
South Sea Cruises

Ena dau yadra talega ena gauna e dau kele kina na waqa ena dua na wavu levu.

O Seruitamana e cakacaka tiko vaka konitaraki me walu na vula ena kabani na Swire Shipping, ka nona tiko na ‘MV Papuan Chief.’

Na ‘MV Papuan Chief’ e dau sik­ova na wasawasa vaka Esia kei na Pasifika.

 

E cavutu mai o Seruitamana mai na koro o Uluibau, Moturiki mai Lomaiviti ka vasu ki Mabula, Cicia mai Lau.

E ratou lewe ono na veitacini, ka isevu ena loma ni vuvale me cabeta na itutu va kavetani ni waqa.

Esa tolu na vula oqo nona soko voli tiko, ka namaki mena cava nona konitaraki ena vula ko Maji ena yabaki mai oqo.

 

E tukuna ni sega ni rawarawa nona dau biuti iratou tu mai nona matavuvale ena gauna e dau soko kina.

“Ena yawa ni vanua au dau soko­ta voli, esa kena kaukauwa ga na masu kei na veimaliwai vinaka vei iratou na noqu vuvale ka vaka kina vei ira noqu itokani vakacaka­caka.”

E se qai vakamautaka na marama watina ko Seruwaia ena vula ko Ji­une ena yabaki oqo.

 

E vakaraitaka mai o Seruwaia ni sa dau lewe tu ga ni nona qaqa ni masu na bula nei Seruitamana ena nona dau soko voli tu.

“Vuqa na gauna e dau taura e walu kina ciwa na vula na dede ni nona dau soko, ka’u vakavinavina­ka ni ra tu raviti au ena veivakasal­ataki kei na veimasulaki o iratou na wekaqu kei ira na lewe ni lotu,” e kaya o Seruwaia.

“Au dau saga me dau matata vei au na duidui ni gauna mai na vei­yasai vuravura e dau soko kina o Seruitamana, ka vuqa na gauna e dau dredre na veitaratara ena gau­na ni soko.

 

“Ia, sa kena dina ga me da dau vakaliuca na Kalou ena noda bula vakavuvale. Me tu donu na noda ituvatuva vakaveiwatini ena mata ni Kalou me rawa ni taucoko na noda bula ni veimaliwai.”

Na nona ivakasala ko Seruitama­na ni kevaka e dua e gadreva me na laki soko mo kakua ni dau soro va­karawarawa, ka mo dau vosota na vei dredre kece o lako curuma. Ena taudaku ni dredre, e tiko na nona ituvatuva na Kalou kina noda bula.

E sa yabaki 30 ko Seruitamana ka sa rawata na nona i vola ni vuli kavetani ena tutu ni ‘Class 4 Mas­ter’ mai na Fiji Maritime Academy ena yabaki 2012.

 

“Au tuvatuva tale tiko ga meu na laki tomana na noqu vuli ena ‘Class 3 Watch keeper’ ena gauna au na lesu yani kina i Viti,” e kaya o Seruitamana.

Ena imatai ni nona soko, e a teki­vu ena Solander Long Line Ship­ping ka nodratou na Golden Ocean company ena yabaki 2013.

Ena nona a tiko voli e Viti, ni se bera ni dewa yani kina kabani ni Swire Shipping, e a taura tu nai tutu ni kavetani ena waqa ni vei­vakaleleci ni saravanua ena kabani ni South Sea Cruises ka dewa yani kina Cruise Holding Ltd ni bera ni dewa sara yani kina Swire Ship­ping.

 

NONA VULI

  • Primary – Rama Krishna Prima­ry School (Class 1 – 8)
  • Secondary– Tailevu North Col­lege (Form 3 – 5),
  • Shreedar Maharaj College (Form 6),
  • Vuli torocake – Fiji National Uni­versity (Trade Certificate for Au­tomotive Engineering ena yabaki 2010. Ka tauri vola ena 2012.)
  • Fiji Maritime Academy, Laucala ena yabaki 2012 (Ka rawata mai kina na nona ivola koroi ni Class 4 Master)

NONA CAKACAKA

  • Solander Fishing Company
  • All engineering and Barging Ltd
  • Captain Cook Cruise
  • South Sea Cruise
  • Cruise Holding Ltd
  • China Navigation Company (Swire Shipping).

Story By: ray@fijisun.com.fj

Rayape Karavaki



Fijisun Ad Space


Get updates from the Fiji Sun, handpicked and delivered to your inbox.


By entering your email address you're giving us permission to send you news and offers. You can opt-out at any time.


Subscribe-to-Newspaper