Sigararama

Siga Rarama: Mo Vakayagataka Vinaka Na Taledi E Solia Vei Iko Na Kalou

Na draki ni bula duidui eda sucu mai kina, e tu vata kei na vei taledi e vakaiyautaki keda kina na Kalou.
08 Oct 2022 11:49
Siga Rarama: Mo Vakayagataka Vinaka Na Taledi E Solia Vei Iko Na Kalou
E duri tu mai nai mawi ko John King kei Sakiusa Waqasesara Bulicokocoko ena dua na veivakamarautaki ni lagasere ka vakayacori mai Lautoka ena yabaki 1970.

Na draki ni bula duidui eda sucu mai kina, e tu vata kei na vei taledi e vakaiyautaki keda kina na Kalou.

Oqo e dua na ka e dodonu meda vakayagataka sara vakavinaka baleta ni taledi oqo era sega ni dau soli vakaveitalia baleta era isolisoli va Kalou vei keda yadudua sara.

Ena macawa oqo eda na raica tiko kina na kena italanoa o Sakiusa Waqasesara Bulicokocoko, e dua na gone iTaukei ka a rogolevu ena dua na gauna ena buturara ni veivakamarautaki e Viti kei na vuravura tani.

Ko Bulicokocoko e cavutu mai ena koro ko Nakorolevu ena tikina ko Namara ena yasana o Tailevu. Ena nona i Tokatoka o Tuinimata, Mataqali o Toga ka Yavusa o Toga.

E levu sara era kilai koya ni turaga mataboko ena gauna e rogolevu mai kina ena buturara ni veivakamarautaki ena 1960.

Ea sucu mai Nausori ena i ka 30 ni siga ni vula ko Jiulai, 1950, ka vasu ki Drekeniwai mai Navatu ena yasana ko Cakaudrove.

 

E rau a qasenivuli ruarua na nona itubutubu, ka rau dau kauti koya voli ena vanua e rau dau lesi voli kina.

Nai talanoa e vakamacalataka e dua na tacina ko Usaia Radrokai ni a sega ni mataboko ko Bulicokocoko, ia e dau lekaleka ga na nona rai.

Ea tekivu susugi mai Korobaba ko Bulicokocoko ena koronivuli na Nabitu District School e nai matai ni nodrau i lesilesi ka kau kina o nodratou nei o Davo Koto me lai meimei tiko ni rau cakacaka ruarua na nona itubutubu.

Ea yaco na veikacivi ni mataivalu me sa gole yani ki Maleya na turaga tamana, ni se bera ni rau lesi sara kina Namara District School kei tinana.

Ea bau susugi talega ko Bulicokocoko mai Drekeniwai ena gauna sa lesi kina na marama tinana kina nona koro.

 

NONA TUBU VOLI MAI O BULICOKOCOKO

E dina ni sega ni tuvaki vinaka tu na nona bula ka dau biliraki voli, ia e sega ni vakataotaka na nona gagadre ena nona vakayagataka vinaka na taledi ka isolisoli ni Kalou vua.

E tukuna ko Radrokai ni gauna e se lailai kina o Bulicokocoko esa tekivu tiko mai kina na nona dau vakaqirita na kuro, veleti kei na kava lala ni samani.

E dau nona ilasalasa tu ga na vanua era bini tu kina na benu se kava ni samani kei na kava ni bisikete lala.

E kaya ni rau dau talanoataka nona itubutubu ni rawa ni moku vakatolu o Bulicokocoko ena dua na siga ena veika e dau vayacora voli.

 

E rau a lesi sara ki Waiqanake, mai kea sa dau kau mai kina ki Suva me mai qaravi vei tinana lailai o Mereoni Kunatuba ni a qasenivuli o Kalivati Kunatuba e Draiba.

Ena so na gauna e dau kauti koya o Ratu Peni Vula Daunibau i Talasiga Suva me ratou lako vata tu, ka dau nona cakacaka o Bulicokocoko na kauta na kava ni benu i gaunisala
ka kauta lesu tale i vale.

E talanoataka o Ratu Peni Vula ni sa dau veiveisau ga na nodratou kava ni benu, ni gauna oya e se kava ni benu kava. Qai dau suka mai na yakavi sa kabibi tu na kava ni benu
ena levu ni nona dau vaqirita ko Bulicokocoko.

 

GOLDEN DRAGON NIGHT CLUB

Ena 1965 rau sa qai veitalanoa sara o Ratu Peni Vula kei na boso ni Golden Dragon Night Club ko Ken Jason ena gauna oya me sa mai vuli lagasere kei na qiriqiri tu mada ko
Bulicokocoko ena nodratou vale ni danisi.

Esa vakadonuya sara o Ken me tolu ga na siga ena veimacawa. E dau qai biuti koya o Ratu Peni ena veiyakavi ka qai kau lesu mai ni sa suka na danisi.

Ena matai ni macawa na nona qiriqiri sa tukuna o boso ni Dragon me sa tudei na nona cakacaka vakaqiriqiri e kea, baleta ni raica ni duatani duadua na taledi e tiko
vei Bulicokocoko. Esa qai dau kau ko Bulicokocoko ena vei yakavi kina Golden Dragon Night Club, ka kau lesu ki vale ni sa dau suka na qiriqiri.

E tukuni talega na imatai ni nona cabeta na turaga ni Toga oqo na buturara ni veivakamarautaki.

 

Era tukuna talega na qase ni bau qirita talega na lali ni meke ena kena dolavi na gaunisala ka tekivu curu mai Nadaro mai Vugalevu, Tailevu ena 1958.

E vakaitavitaki koya ena levu sara na matasere rogo levu ka se taura tiko o Solomone Bulicokocoko koya gone vua nai wasewase ni sede (royalty) ka dau vakau mai ena Fiji Performing Right Association (FPRA).

E vakawati ki vua e dua na marama ni valagi ko Bulicokocoko, ia rau sega ni vakaluveni. E rau qai gole ki Hawaii mai Amerika ka lai vakatikotiko tudei mai kina me ya-
cova nona mai leqa ena 2007.

A qai mai vakotori tale na yagona ena nona koro ena vanua era davo tu kina na nona qase.

 

ESO NA SERE ROGOLEVU E LAGATA O BULICOKOCOKO WILI KINA NA:

  • Lade Rika Au Lade
  • Adi Kalavo
  • Ni Cila na Vula
  • Isa Lei Lia
  • Ono na Maile
  • Veibogi kece
  • Nuku Vulavula
  • Veivei Gauna
  • Lik Lik Tin Fish
  • Rui Totoka
  • Sobo Lei

 

Italanoa Mai Vei: LUSIANA TUIMAISALA

Ivakamacala Eso: lusiana.tuimaisala@fijisun.com.fj



Got A News Tip


Get updates from the Fiji Sun, handpicked and delivered to your inbox.


By entering your email address you're giving us permission to send you news and offers. You can opt-out at any time.


WEET BIX
For All Fiji Sun Advertising
Fijisun E-edition
Subscribe-to-Newspaper