Sigararama

Meda Maroroya Vinaka Na Noda Itovo Na Itaukei

E totoka ni da sarava na nodra matanataka tiko na noda itovo kei nai valavala vaka­vanua na o ira na wekada era tiko mai vanua tani.
15 Oct 2022 16:23
Meda Maroroya Vinaka  Na Noda Itovo Na Itaukei
E daramaka toka oqori ko Laura Unise Coriakula na isulu vaka Viti, ka rau toka e yasana na nona itubutubu ko Mary kei Netani Coriakula.

E totoka ni da sarava na nodra matanataka tiko na noda itovo kei nai valavala vaka­vanua na o ira na wekada era tiko mai vanua tani.

Oqo e vakaraitaka ni’da vakamareqeta ka vakaqaqacotaka tiko na kena vakavulici vei ira na luveda ena nodra bula ena veisiga.

Oqo e tekivu sara mai ena noda kila vinaka na noda vosa ni sucu, kei na veika me baleti keda yadudua sara ena veika eda kilai kina.

 

Ena macawa sa oti kei na macawa oqo, era marautaka tiko kina na noda era sa vakai­tikotiko mai Ositerelia na macawa ni Vosa Vakaviti, oqo e salavata na kena vakananumi na tu vaka ikoya ni noda vanua (independ­ence day).

Oqo era dau vulica ka vakabulabulataka kina na vosa vaka viti, na noda itovo kei na veika eda kilai tani kina, me vaka na keda ka­kana, na noda isulu, na ibe kei na vuqa tale.

 

Ena macawa oqo, era a vulica kina e vica nai ulutaga me baleti keda na iTaukei; me vaka na vanua o cavutu mai kina, mo na vakama­calataki iko vakacava ena nomu na kidavaka e dua na nomu itokani se dua na wekamu.

Na kena vakarautaki na soqo oqo e rau veitauriliga ena kena vakarautaki e dua na veitamani ko Netani Coriakula kei na luvena goneyalewa ko Laura Unise Coriakula.

 

E rau cavutu mai na koro o Levukaidaku, Matuku ena yasana o Lau ka rau vakaitiko­tiko mai Malevani.

E kilai tani o Netani ena cokaidrauna ni nona buiniga kei na nona dau vakamareqeta na nona itovo vakaviti.

E qasenivuli ni veika vakaviti ka dau vakat­avulici iratou talega na nona vuvale me ra­tou dau kila na nodratou isema kina vanua.

 

O Laura esa yabaki 28, e vasu ki Ositerelia ka sucu ka tuberi cake talega mai kina.

Ia e matata vinaka tu vua na nona vosa vakaitaukei, itovo kei na nona sema ni vei­wekani. Oqo e vakaraitaki ena nona dau me­ketaka na meke vakaviti mai valagi me yaco sara ki New York, Los Angeles ka vaka kina ena nona a mai meketaka ena soqo ni Levu­kaidaku Day ena yabaki oqo.

 

E a bucini na nona dau taleitaka na meke ena dua nodratou a siko mai ki Viti ena sota vakavuvale ni se qai yabaki 16.

E a mai sarava kina na talei ni veimaliwai mai vei ira na wekana ka mai taleitaka sara vakalevu na meke baleta ni oqo e dua na sala ni noda talanoataka se wasea kina na itukuni se italanoa makawa me baleti keda.

 

NA MEKE MOVEMENTS

E taukena tiko o Laura e dua na nona bisini­si ena mona livaliva (Online business ena Fa­cebook kei na Instagram) ka vakatokai tiko na ‘Meke Movements’ ka tauyavutaka ena yabaki 2018.

Oqo e dau vakatavulici kina na meke, itovo, vosa kei na noda bula vaka Viti kivei ira era dau via vulica na veika vakaviti ka ra sema mai kina mona livaliva mai na veiyasai vu­ravura.

 

E kaya ko Laura ena gauna ni COVID, ea wasea talega ena mona livaliva na nona a va­vakulataka e dua na ibe me vakatamurimu­ria e dua na ibe ea raica ena dua na tevutevu ka se talia o buna.

“Na yacani ibe oqo na vaqanivasua. Au a volia mai na kula kau mai cakava. E a rawa oqo ena ivakasala nei tamaqu kei na dua na irairai ni ibe oqo keirau a sarava ena iyaloy­alo (VHS tape) ena dua na soqo ni tevutevu ena dua na gauna makawa.”

 

Tomana ko Laura ni a vulica na tali ibe mai vei nona nei o Taraivini Coriakula, ia a qai mai vavakulataka ga okoya e dua tale na ibe ka dau kilai tani kina na yanuyanu o Matuku, oya na tusi.

E vuqa vei ira na vuli tiko ena tabana ni vuli oqo era gone ni Viti, e so era vasu mai ki Viti, ka so tale era sema mai ki Viti ka ra guta me ra vulica na noda itovo na iTaukei.

 

E na iwasewase ni vuli oqo, ena vakata­vulici tiko kina na ulutaga me baleta na noda kilai keda, na vanua eda cavutu mai kina kei na noda cibitaka na veika oqo.

“Au vakavinavinaka vua na turaga na tamaqu ena veituberi kei na veivakasala­taki e dau vakayacora vei au ena noqu sasaga meu kila na veika me baleti Viti,” e kaya o Laura.

 

E kaya ni rau dau cakacaka vata ena kena vakaqaqacotaki na kena vulici na noda itovo nai taukei. E dau nona itavi o Netani na veivakavulici, ia e nona i tavi o Laura me dau soli vakasama ena kena va­karautaki na kena ilavelave ena iwalewale ni vuli e gadrevi me na vakavulici kina na itovo vakaviti me veiraurau kei na gauna eda sa donuya tu oqo.

Oqo me vaka na kena tabaki vaka-i-yaloy­alo na kena tali kei na vavakulataki na ibe, na masi, meke kei na vuqa tale.

 

Oqo sai vakaraitaki vinaka ni tekivu saraga mai na loma ni noda vuvale na kena vaqaqacotaki ka mareqeti ni noda itovo na itaukei.

 

IVAKASALA

Kivei keda eda sasaga se tatadrataka tu meda tauyavutaka e dua na noda bisinisi ena mona livaliva, sa veivakasalataki o Laura, ni taumada, meda bucina e loma­da na veivakabauti me rawa nida dei ena noda vakabauta nida na rawata na noda sasaga.

E da na qai tuvatuvaka ka sau­sauvaki yani ena kena cakacakataki me yacova sara ni sa vakavotukana na noda tatadra ni bisinisi.

E dabe tiko oqori ko Laura Unise Coriakula kei na so na ibe vaka Viti ka a vavakulataka. E dabe ravita toka na nona ibe na Vaqanivasua.

E dabe tiko oqori ko Laura Unise Coriakula kei na so na ibe vaka Viti ka a vavakulataka. E dabe ravita toka na nona ibe na Vaqanivasua.

 

Story By: ray@fijisun.com.fj

 



Got A News Tip


Get updates from the Fiji Sun, handpicked and delivered to your inbox.


By entering your email address you're giving us permission to send you news and offers. You can opt-out at any time.


WEET BIX
For All Fiji Sun Advertising
Fijisun E-edition
Subscribe-to-Newspaper