Sigararama

Siga Rarama: Vakarautaki Na Sausauvou Kei Ra Ena Vuli

Na Sigavou kei Ra e vakatabakidua kivei ira na gone era sega ni rawata na sikolasivi ni Matanitu okoya na TELS kei na Toppers.
16 Oct 2022 15:01
Siga Rarama: Vakarautaki Na Sausauvou Kei Ra Ena Vuli
E dabe tiko mai na imawi na turaga na Tui Nalawa ko Ratu Epeli Niudamu ena soqo ni Sigavou kei Ra ka a vakayacori mai na Ra High School ena siga Moniti.

Na vuli ena valuta na bula dravudravua ena noda vanua, ena vakatoroicaketaka na noda itikotiko kei na bula ena loma ni vuvale ka vaka kina ena noda itikotiko vakavanua.

Oqo na veika e wasea na liuliu ni Sigavou kei Ra Scholarship Trust Fund, ko Ratu Josaia Niudamu, me baleta na kumuni ilavo ka vakayacori mai na Ra High School na siga Moniti ena macawa oqo.

E vakamacalataka ko Ratu Josaia ena Bose ni Yasana o Ra ka vakayacori ena 2014, a kau cake mai kina ni yasana o Ra e dua na yasana drav- udravua i Viti. Nai tukutuku oqo e kaya a qai tabaki ena niusiveva.

 

E kaya ni vaka e raibeci ka vakalolovirataki kina na yasana ena itukutuku a mai tabaki oya.

Nai tukutuku talega oya e qai veibole vei iratou na turaga ni vanua, ka’ra sa qai vakasalataki mai vei dua na nodra qase levu talatala Ili, sai koya mera vakaliuca mada iliu na vuli, ni vuli ga ena rawa ni vakatoroicaketaka na nodra bula kei na yasana.

A qai mai tauyavutaki kina na Sigavou kei Ra ena yabaki 2018, oqo me vakatabakidua saraga na kumuni ilavo ni sikolasivi vei ira na luvei Ra era sotava tiko na dredre ka sega ni rawata na icurucuru ni vuli ena vuli torocake.

Ko ira na lewe ni yasana o Ra era tiko rawa ena Sigavou kei Ra ka vakayacori ena Ra High School ena siga Moniti.

Ko ira na lewe ni yasana o Ra era tiko rawa ena Sigavou kei Ra ka vakayacori ena Ra High School ena siga Moniti.

E levu na gone e kaya o Ratu Josaia ni ra sa biu vuli dole baleta na leqa ni curucuru ni vuli kei na vanua era dau lai vakaitikotiko kina.

Na Sigavou kei Ra e vakatabakidua kivei ira na gone era sega ni rawata na sikolasivi ni Matanitu okoya na TELS kei na Toppers.

Na sikolasivi oqo me sa tu ga mei sasabai vei ira na gone ni Ra.

Na siga Moniti sa ikarua ni gauna me vakayacori kina na Sigavou kei Ra. Nai matai a vakayacori mai Lautoka ena 2019, ka’ra vakaitavi kina na gone ni yasana era tu ena vanua ni cakacaka. Ea qai mai tao tu na soli oqo baleta na matetaka na COVID-19.

Tukuna ko Ratu Josaia ni a qai bosea na Bose Vanua o Ra me sa caka ena vanua ena yabaki oqo na soli ka mera vakaitavi kece kina na 93 na koro ena loma ni yasana.

 

Nai tuvatuva ni soli ea vakayacori oya me solia e $1000.00 dua na koro, era qai vakaitavi ga e 45 na koro. Era qai kumuna rawa kina e $96, 971.00.

“Eso na koro era se qai yaco tiko mai nodra soli, eso era se soli tu vaka vo.”

Tukuna ni soli ka’a mai vakayacori oqo, e kauti ira vakavoleka mai na lewe ni yasana, ka ra a solevutaka talega na nodra qaqa mai na qito ni Deans Trophy na under 19 ni Ra High School.

E kaya na takete sa tiko mera na rawata e $100,000.00 ena yabaki vou. Na Sigavou kei Ra e kaya e sana dau vakayacori ena vei yabaki kece ena i ka 10 ni siga ni vula ko Okotova.

 

DEED OF TRUST- SIGAVOU KEI RA

Tukuna o Ratu Josaia, ni sa vakamatatataki tu ena ‘Deed of Trust’ ni Sigavou kei Ra, me yacova na $500,000.00, na ilavo me kumuni rawa ni se bera ni dola se veisoliyaki na sikolasivi oqo.

“Keitou nakinaki tiko me na rawati na tatadra oqo ena loma ni lima na yabaki.”

E kaya ni tuvatuva e tiko me qai yabaki 2025 me sa soli na sikolasivi, ia esa kena rairai tiko ni sana toso mai liu baleta ni sa totolo na kena rawati na takete oqo.

E kaya o Ratu Josaia ni ratou sa ciqoma tiko eso na qiri mai vei ira nai tubutubu me baleta na dredre e sotavi ira tiko ena kena sagai na vuli.

 

“Sa keimami vakasalataki ira tiko mera wawa vakalailai me yacova na $500,000.00 me matua vinaka ka me wasei na tubu ni ilavo vei ira na gone era gadreva dina tu na veivuke ni sikolasivi. E tu vakarau na yasana me na tokoni ira mera na rawa nodra vuli ka me ra tamata yaga mai muri.”

E vakadeitaka talega mai ni sa tuvatuvaka tale tiko ga na Sigavou kei Ra me tara e dua na bure ni gonevuli mai Lautoka me vaka ni sa tiko na qele ka 15 na eka. Oqo me baleti ira na gone ni Ra era na vuli ena yasayasa vaka-Ra – vuli torocake. Na kena tara na bure oqo e kaya o Ratu Josaia era na vaqara na kena ilavo, ka na sega ni kau mai ena ilavo ni sikolasivi.

“Na gone ni yasana o Ra era sa cabeta na veitabana ni cakacaka kece ena noda vanua. Era sa vakaitutu vakamatanitu. Keimami sa raica e dua na veisau levu ena loma ni yasana. Keimami vinakata me keimami tosoya cake tiko ga na neimami tatadra, me ra rawata talega na luvei keimami na veika era sa biuta tu mai na qase.”

 

Italanoa Mai Vei: LUSIANA TUIMAISALA

Ivakamacala Eso: lusiana.tuimaisala@fijisun.com.fj



Got A News Tip


Get updates from the Fiji Sun, handpicked and delivered to your inbox.


By entering your email address you're giving us permission to send you news and offers. You can opt-out at any time.


WEET BIX
For All Fiji Sun Advertising
Fijisun E-edition
Subscribe-to-Newspaper