E $74.5 na milioni e vakayagataka na matanitu mai na yabaki 2014 kina 2021 me vakatoroicaketaki kina na yasana o Ra. Na veivakatoroicaketaki e vakayacori oqo era sa vakayagataka ka vukei kina vakalevu na lewenivanua.

Oqo na veika e vakaraitaka nai liuliu ni noda matanitu na Paraiminisita o Voreqe Bainimarama ena nona lai dolava na Bose ni Yasana o Ra ka vakayacori ena itikotiko ni matanitu mai Nanukuloa ena siga Vukelulu. Tukuna ko Bainimarama ni cakacaka sara tiko vakaukauwa na matanitu me vukea eso na leqa e dau vakatataotaka tu na nodra toso ki liu na lewenivanua o Ra.

E vakaraitaka o Bainimarama, mai na $74.5 na milioni, e sivia na $27 na milioni e vakagolei me taqomaki ira na malumalumu, dravudravua kei ira na sega ni tuvaki vinaka tu na yagodra (social pension scheme).

E $16 na milioni e vakatoroicaketaki kina na kena sagai me vakadrodroi na livaliva ena loma ni vanua. “Oqo e sega ni dau tauri tu vakabibi me yacova ni sa mai veiliutaki na noqu matanitu.”

E vakayagataki e $8 na milioni na vakadrodroi ni wai, ka $6 na milioni na kena vakavinakataki na gaunisala kei nai tatakoso. E $3 na milioni e vakayagataki ena kena vakatoroicaketaki na loma ni vanua ena loma ni yasana. Tomana ko Bainimarama ni tu tale eso nai tuvatuva ni matanitu me tosoya na veivakalivalivataki, wai kei na kena sagai me vakarawarawataki na veitaratara ena talevoni veikauyaki.

ENA QAI TOMANI TALE YANI ENA MACAWA KA TU MAI

Story By: Rayape Karavaki

Feedback: ray@fijisun.com.fj