Siga Vou | Sigararama

Me Vakabulabulataki Nai Tovo Kei Na Cakacaka Ni Liga: Wong

E vakadreti ira tiko nai Soqosoqo vakamarama e Viti na iliuliu ni soqosoqo ni marama mai na yasana o Ra me ra kakua ni wele ka mera vakabulabulataka tiko na itovo eda kilai tani kina na marama iTaukei.
29 Oct 2022 16:05
Me Vakabulabulataki Nai Tovo Kei Na Cakacaka Ni Liga: Wong
Na iliuliu ni soqosoqo ni marama ni yasana o Ra ko Salacieli Wong. E toka mai dakuna na nodra vale ni maroroi yaya ka sa tara vaka vo tu.

E vakadreti ira tiko nai Soqosoqo vakamarama e Viti na iliuliu ni soqosoqo ni marama mai na yasana o Ra me ra kakua ni wele ka mera vakabulabulataka tiko na itovo eda kilai tani kina na marama iTaukei.

Tukuna ko Salacieli Wong ni sa nodra itavi na veisoqosoqo ni marama oqo na kena vakabulabulataki na cakacaka ni liga me vaka na talitali, na vakasaqari ni kakana, kei na veika tale eso. Ea vosa tiko ko Wong ena Bose ni Yasana o Ra ka vakayacori mai Nanukuloa ena siga Vukelulu, ka vakabibitaka kina na kena sa seavu tiko yani vakamalua eso nai tovo ka dodonu me vakavulici tiko vei ira na luveda yalewa.

VAKATUTU

E kauta cake ena bose ni yasana o Wong ke rawa ni raica na matanitu na kena ‘tarseal’ na gaunisala kina Ra Maternity Hospital. Oqo e kaya me vakarawarawataka na veitosoyaki vei ira na marama era lai vakasucu se laurai.

A kerea na matanitu ke rawa ni veivuke ena kena conaki ka vakaiyayataki na nodra valenikuro ni veiqaravi na isoqosoqo ka me na vakarawarawataka kivei ira na nodra veiqaravi. E vaka talega na nodra gagadre ena kena vinakati me tarai vakaoti na nodra vale ni maroroi ni yaya (storage room).

E kaya o Wong ni a mai vakataotaka vakalevu na nodra sasaga na kena yaco mai na mate-taka na COVID-19, ka mai vakaleqa vakalevu na nodra ituvatuva. E dua na vale esa tara rawa toka ka ra veiqaravi tiko mai kina na marama ena siga ni Bose ni Yasana, e yacana tiko na Ra Women’s Kitchen and Rest House.

Oqo e a dolava na mata ni komisina ni Niusiladi, o Tia Barrett, ena yabaki 2000. E kaya ko Wong ni ra vinakata nai soqosoqo me na vakagalalataki na nodra iyau ni Soqosoqo ka tiko ena vale oqo, me na laki maroroi vakavinaka ena nodra vale ni maroroi ni yaya, ni se bera ni vakatoroicaketaki na loma ni vale me sana vakayagataki me bure ni vulagi (Guest house).

E sa veivakauqeti tiko o Wong kivei ira na sausauvou kei Ra e na kena vakabulabulataki tale na noda itovo vakaviti. Oqo e kaya e dua talega na gaunisala era na kila kina na itabagone na veika me baleti ira ka me ra na qai laki bulataka ena veiyasai vuravura era na lai qaravi itavi voli kina.

E 93 na koro era lewena tiko nai soqosoqo vakamarama ni yasana o Ra.

ENA QAI TOMANI TALE YANI ENA MACAWA KA TU MAI

Story By: Rayape Karavaki

Feedback: ray@fijisun.com.fj



Fijisun Ad Space


Get updates from the Fiji Sun, handpicked and delivered to your inbox.


By entering your email address you're giving us permission to send you news and offers. You can opt-out at any time.


Subscribe-to-Newspaper