Siga Rarama

Siga Rarama: Nai Sevu Ni Dikonesi E Vatu Ko Gonedau

E levu sara vei ira era dau sotava na dredre ni vakanananu lesu ivale, ka vaka kina na veitemaki ni vuravura kei na bula ni vakailala. 
21 Nov 2022 12:23
Siga Rarama: Nai Sevu Ni Dikonesi E Vatu Ko Gonedau
E duri tiko ena loma donu ko Dikonesi Seini Gonedau, ka rau mai duavata ena nona soqo ni tauri ivola e Nasese na nona i tubutubu ko Pita Kidavura kei tinana o Ruci. Veitaba: Lusiana Tuimaisala

E dina ni sotavi voli mai na dredre vakailavo ena kena sagai na vuli kei na bula ena veisiga, oqo e sega ni vakataotaka na nona sasaga e dua na luvei Lalagavesi me rawata na nona vuli dikonesi ena loma ni lotu Wesele e Viti kei Rotuma.

Ena siga Vukelulu ni macawa oqo, era marautaka kina e Suva na lewe ni koro o Vatu ena tikina o Tawake ena yasana o Cakaudrove, na nona sa mai rawata nona ivola ni dikonesi ko Seini Gonedau, ka isevu mai na nona loma ni koro me cabeta nai tutu oqo.

Na soqo ni bula oqo e kauti ira vata mai na gone ni Vatu ka’ra vakaitikotiko e Suva kei na yasayasa vaka-Ra ka’ra marautaka na kena mai cabeti e dua nai sausauvou.

E sega ni rawarawa nai lakolako era dau lako curuma na marama era vuli dikonesi ena loma ni tolu na yabaki.

 

E levu sara vei ira era dau sotava na dredre ni vakanananu lesu ivale, ka vaka kina na veitemaki ni vuravura kei na bula ni vakailala.

Ia, vei dikonesi Seini, na dredre e lako curuma mai ena matai ni nona yabaki me yacova na nona sa mai taurivola, e sega ni lakolako rawarawa.

Esa yabaki 26 nikua, ka kaya ni rawata ga na nona vuli ena kaukauwa ni masu kei na nona vakararavi tiko vua na Kalou ena veisiga me vakavotukana na nona tatadra.

A vuli mai na All Saints Secondary me yaco na fomu vitu, ni se bera ni dewa yani ena Univesiti ni Ceva ni Pasika (USP) ena 2015. A nona ituvatuva voli mai me rawata na nona vuli ka cakacaka vaka dau ni fika.

 

Ena matai ni nona yabaki ena USP, e sota kaya voli na dredre ni bula vakailavo ena saumi ni nona icurucuru ni vuli, ka salavata nona dau vakananumi rau nona itubutubu ka rau tiko voli mai nakoro ena kena vaqarai nai lavo me rawa kina na bula ena veisiga kei na saumi ni curucuru ni vuli.

A qai mani nanuma me lesu tale ki nakoro me lai vukei rau na nona itubutubu.

Ia, me vaka ga na draki ni bula vakavanua, e tiko nai tavi ni matavuvale, ka tu talega nai tavi e dodonu meda qarava vata ena veisiga wili kina na kaci ni Vanua, Lotu kei na Matanitu.

E kaya na itavi kece oqo, e dau colata voli ga ko tamana ka sega ni dau vakaulubale.

E dau qoli na turaga tamana, ka dau tali ibe me volitaki, ko tinana. Ia e sega ni dau tudei na nodratou ivurevure ni ilavo ena veisiga.

Ena gauna a lesu tale kina i nakoro o Seini, a qai dau nona cakacaka voli na vukei tamana ena wili lesoni (Vola Tabu) ena vanua e dau vakaitavi voli kina.

 

A tomani tamana voli tiko oqo me yacova ni yaco yani ki nakoro nai ivola kerekere ni circuit school, ka a mani vakalewena sara.

E marau ko Seini ni sa vakadeitaki nona dabedabe ena vuli dikonesi, ka vaka kina ni sega ni dau saumi kina e dua na ka.

A tekivu vuli mai na Naqelekula Circuit School mai Cakaudrove ena yabaki 2017 kina 2018, ni se bera ni dewa mai ena Deaconess House e Samabula, Suva, me mai vakacavara kina na nona yabaki tolu ni nona vuli.

Ena matai ni yabaki ni nona vuli, e kaya ko Seini, nia yalataka vei tamana nina rawata na nona vuli ka mena tiko ena nona taurivola.

Ia, ni vo tiko e vica na vula me taurivola kina, a sa qiritaki mai vua ni’a robai tamana na vai ena gauna a qoli tiko kina, ka sa duatani nai tuvaki ni yagoi tamana.

 

“Au rarawataka na ka a mai yaco oqo, lakovata na noqu vakasamataki Tata kei na dredre rau sota kaya tiko mai nakoro ena veisiga. E lako mai ena noqu vakanananu meu sa biuta na vuli, ka lesu ki nakoro meu lai qaravi koya. Ia, ena dua na siga a qiri mai ko Tata, ka tukuna mai: “Luvequ vakaukauwa tiko, o iko o sana vakacavara duadua na nomu vuli.”

Tomana ko Seini ena tagi ni luluvu ni vakatara na Kalou me ratou mai sota bula kei rau na nona itubutubu ka marautaka vata nona taurivola, e dina ga ni sa vesuki tamana tu na bibi ni vau ni tauvimate.

E ra lewe va taucoko na marama era tekivutaka vata na vuli dikonesi, ka rau lewe rua ga na vakacavara vinaka.

 

TURAGA TAMANA 

Na turaga tamana ko Pita Kidavura, esa yabaki 53 nikua.

E luluvu ni marau ko Pita ena gauna e wasea tiko kina na gauna dredre e ratou lako curuma mai vakaveitamani me rawata kina o Seini na nona vuli dikonesi.

“Au raica tiko ni dau veivakarautaki ga na Kalou ni dua na ka dina eda sasagataka tiko.”

E kaya ni dau nona mala ni vosa tu ga e veisiga vei ratou na vitu na luvena: “Au sega ni marautaka mo dou vuli ka cakacaka qai mani sega ni dou kila na Kalou. E dodonu me liu tiko na Kalou ena veigauna kece. Me da vakasaqara taumada tiko ga na matanitu ni Kalou, veitalia na veika dredre eda lako curuma.”

Tomana ka kaya e dina ni sa mai dikonesi ko Seini, io e rau na sega ni cegu na tokoni koya tiko ga ena vanua ena lai veiqaravi voli kina.

 

LIULIU NI DIKONESI 

E vakadeitaka mai nai liuliu ni dikonesi ko Salanieta Naucabalavu ni 100 taucoko na levu ni dikonesi, wili tiko kina ira na sa vakacegu kei ira na se qai tauri vola.

E kaya ko Salanieta ni tolu na yabaki na vuli dikonesi, ka rua na yabaki na vakatovotovo (probation).

Na vuli e dola ga vei ira na sa yabaki 21 ka lako cake.

 

Feedback: lusiana.tuimaisala@fijisun.com.fj



Fijisun Ad Space


Get updates from the Fiji Sun, handpicked and delivered to your inbox.


By entering your email address you're giving us permission to send you news and offers. You can opt-out at any time.


Subscribe-to-Newspaper