E dua na gauna vinaka kivei ira nai soqosoqo vakamarama ena wasewase na Tokalau wili kina na yasana ko Lau kei Lomaiviti, ena siga rua ni nodra mai vakaraitaki cakacaka ni liga (Eastern Division, Lau & Lomaiviti Women’s Expo) ena koro turaga levu e Suva, tekivu mai ena siga Lotulevu ka sa mai cava ena siga e nanoa.

E levu sara vei ira e se qai matai ni gauna me ra mai vakaitavi ena veisoqo levu ni vakaraitaki cakacaka liga vaka oqo, ni levu sara veika era mai raica ka vulica.

Vakaraitaka o Raijieli Gadi mai Totoya Lau, na nona mai vakaitavi ena rua na siga ni tadola na rai ena veika e mai raica ena veicakacaka ni liga tale eso.

Esa yabaki 30, ka sa 20 vakacaca na yabaki nona cakava tiko mai na tali ibe kei na so tale na cakacaka ni liga ka dau volitaka me nona vurevure ni ilavo, ka me veivuke vi ratou na tolu na luvena.

E dau cakava talega na waiwai, voivoi, vau ka dau caka kina na salusalu.

Ena loma ni macawa e dau rawata tiko e $300 mai na nona cakacaka ni liga.

E vakaraitaka o Sala Seci, mai Oneata mai Lau ni se vulica na cakacaka ni liga mai vei tinana na gauna e se lalai kina.

Esa yabaki 18, ka matai talega ni gauna vua me mai tiko ena dua vanua ni vakaraitaki cakacaka ni liga.

Ko Sala a mai vakaraitaka tiko ga na sasa, na qele damu kani kesakesa, na vau e dau vakayagataki me caka kina na salusalu, kei na gatu vakaviti.

Esa tuvatuva ka tiko ko Sala me vakaduria nona bisinisi ni cakacaka ni liga.

E kaya ni cakacaka ni liga vaka Viti e rawarawa ka levu kina vurevure ni lavo ka na rawa ni bula kina na vuvale.

E veivakasalataki tiko o Sala vei ira na marama iTaukei mera vakayagataka vinaka na taledi e tiko vei ira mera vakaduri bisinisi kina, ka me ra kua so ni vakararavi vakalevu ena veivuke ni matanitu.

Feedback: aselemo.tabuakacivil@fijisun.com.fj