E so na veika e da kilai tani kina na kawa iTaukei era sa seavu ka yali tiko yani vakamalua. 

 Oqo wili kina na noda vosa, itovo kei nai valavala kei na veika e kilai kina wna 14 na yasana. Ia, nikua esa cakacaka sara tiko vakaukauwa na Tabacakacaka iTaukei ena kena vakabulabulataki ka vakalesui tale mai. 

Ni da vakadikeva vakamalua e na gauna e daidai, e sa seavu tiko yani vakamalua eso na noda itovo na kawa iTaukei kei na veika e da dau kilai tani tu kina.  

Oqo e vuna me sa cakacaka sara tiko vakaukauwa na matanitu ena kena sagai me na vakalesui tale mai na veika e baleti keda.  

Oqo na veika e vakaraitaka na Vunivola Tudei ni Tabacakacaka iTaukei ko Pita Tagicakirewa e na kena mai dolavi ena siga Lotulevu na nodra bose siga rua na vei Turaga kei na Marama Bale ni veiyasana e 14, wili tiko kina o Rotuma ka vakatokai tiko na ‘Vakaturaga Conference’.  

E vakaraitaka ni bose siga rua oqo e na vakatabakidua saraga e na kena veitalanoataki na kena vakalesui tale mai eso na veika esa yali se kau tani, ka vaka kina na kena veitalanoataki nai lavelave ni ripote mai vei iratou na i lawalawa ni railesuvi ni Bose Levu Vakaturaga kei so talega na ulutaga bibi e kau cake mai e na veibose ni Yasana ka sa vakayacori oti.  

E kaya ni bose oqo e tautauvata kei na bose ka vakayacori mai Bau wili kina ratou na Turaga kei na Marama bale ni veiyasana. Na kena railesuvi na bose ka taura e va na vula na balavu ni kena vakadikevi e na veiyasana ka sa kaburaki kece tiko e na bose siga rua ka mai cava ena siga e nanoa.  

Vakaraitaka talega ni veiulutaga vaka koya e tarai keda taucoko na kawa iTaukei me vaka na kena sagai me vueti na noda bula vakailavo, na kena sa dewa vakaveitalia na mate ni veiyacovi ka vakatokai tiko na (HIV/AIDS), ka vaka kina na kena vakaqaqacotaki na bula kei na veiliutaki vaka iTaukei, wili talega kina na kena tarai cake na nodra vuli na noda kawa e na veisiga ni mataka.  

Tomana nona vakamacala ka kaya ni tu vei keda na iyau kei na vakasama ni kila ka vakavanua ka sa vaka me sa seavu tiko yani.  

Ia, e kaya na yaga gona ni bose oqo me tautaunaki tale vei ira na Turaga kei na Marama Bale ni vanua na veika me baleti keda na iTaukei ka me ra na laki vakasavuya e na nodra yasana.  

E kaya talega ni ratou sa tuvatuvaka tiko me ratou vaqaqacotaka na kena vulici na vosa vaka iTaukei ka vaka kina na veika vakaviti e na veikoronivuli me tekivu saraga mai ena sovanivuli me yaco kina vuli torocake.  

Na vakatutu oqo e kaya me na qai kau cake kina Tabana ni Vuli ka me na laveti cake ena nodra bose ka na vakayacori tiko e na vula oqo.  

E kaya ni marautaki na nodratou veivakararamataki na kabani ni Yatu Lau, oqo e dua na kabani iTaukei ka sa toso vinaka sara tiko e na noda vanua ena vuku ni veivakatoroicaketaki ena vanua, vuli kei na matanitu, ka sa na dodonu me ra vuli mai kina na veiyasana tale eso.  

“O ya e dua talega na vuna e ra sureti mai kina ko ira na liuliu ni bose ni veiyasana me ra mai rogoca na veika me baleta na veivakatorocaketaki ka me solia e dua na yalo ni bolebole vei ira me ra laki veitalanoa kei na nodra kabani ni yasana se cava e ra rawa ni cakava.” 

Story By: salaseini.guniyaga@fijisun.com.fj