Era marau na yavusa Bati ena Vanua o Lutu ni ra sa colata tale na nodra i wau me ra yadrava tale kina nai tikotiko vakaturaga ni oti e 16 na yabaki. 

Oqo ena nodra yadrava na Tui Lutu o Ratu Isireli Ronaiteqe ena siga ni nona vakagunuvi ena Vakarauwai sa oti ena koro o Lutu mai Naitasiri. 

Vakaraitaka o Navitalai Rokotuitai ni i wau era colata oya e nodra i wau na nona qase, na i wau ni qaqa. 

“Oqo na nodra iwau ni vala e liu na yavusa Bati. O keimami na kena tamata keimami se bula tiko nikua, keimami na tomana tiko na kena yadravi na gone turaga na Tui Lutu.” 

E kaya ni bibi ni nodra itavi sai koya mera yadrava ka viribaita tiko na Tui Lutu me kua ni dua na bukivere e yaco vua ena gauna ni veibuli se veivakagunuvi. 

“Na mana kei na kaukauwa ni valu ena gauna e liu, e se tiko ga ena wau oqo. Kevaka e dua e via nakica ena moku, kei na mana e tiko e nai wau ena vakatakila na meca. 

“Sa keimami cakava tale nikua, me rawa ni bula tiko ga na Tui Lutu.” 

E marau ko Navitalai ni oqo sai katolu ni Tui Lutu e yadrava tekivu mai na gauna e kalasi va tiko kina ena yabaki 1975. 

“Au dokadokai au niu donua kece ka vakaitavi ena nodratou vakagunuvi na tolu na Tui Lutu oqo.” 

E kaya ni dua na gauna vinaka talega me ra vakavulici o ira nai tabagone e nai walewale ni veiyadravi kei na nodra itavi vakavanua. 

“Na soqo oqo era vakaitavi vakalevu kina na gone, ka sa vakadewataki ga vaka gusu na veika e dau vakayacori. Keimami na qai yali yani era sa kila tiko na gone na veika me ra cakava.” 

Tomana ko Navitalai ni siga oqo ena sega ni lesu tale mai, ka na guiguilecavi dredre vei ira na yavusa Bati era vakaitavi ka tiko donuya. 

Story By: Lusiana Tuimaisala 

Feedback: lusiana.tuimaisala@fijisun.com.fj