Siga Vou | Sigararama

Tukutuku ni Veigauna Na Cadra Ni Noda Radini Peresitedi Vou

E dina ni lai vakawatitaka na turaga, ia e biuti koya tu ga ira ka vakamuria vinaka tiko ga na itovo kei na valavala vakavanua e dodonu me vakayacora vua na turaga watina.
15 Dec 2021 11:00
Tukutuku ni Veigauna Na Cadra Ni Noda Radini Peresitedi Vou
Na marama na radini Peresitedi ni noda vanua o Vilomena Dikumete Nakete. Vei Taba: Laisa Lui

Ko Vilomena Dikumete Nakete na watina na turaga na Tui Macuata ka Peresitedi ni noda vanua o Ratu Wiliame Katonivere.

E rua na luvedrau.

O Vilomena e cavutu mai ena Tokatoka o Nabariqi, Mataqali o Namama, Yavusa o Namama, Koro o Namama ena yasana vakaturaga o Macuata.

 

Na nona itubutubu turaga o Samuela Nakete, kei na nona tubutubu marama o Laite Balaisaga.

Na nona itutu vakavanua na Qase se na Matua ni Valelevu.

Oqo e kena ibalebale e liga ni veiqaravi ka dau ni vakasala ki vei ira na turaga se na vuvale vakavunivalu na Tui Macuata.

 

E ratou lewe va ena nona loma ni vuvale ka karua ni ulumatua.

E tukuna o Vereti Veisamasama mai na koro ko Namama, nio Vilomena, e dua na marama dau rerevaka na Kalou.

E dua na marama yalodina ena nona qarava nai itavi ni vanua, lotu kei na kaci na matanitu.

 

E dina ni lai vakawatitaka na turaga, ia e biuti koya tu ga ira ka vakamuria vinaka tiko ga na itovo kei na valavala vakavanua e dodonu me vakayacora vua na turaga watina.

Tomana ko Vereti ni yalo kei na itovo ni bula nei Vilomena era kila kece na tamata.

E lomani ira vakatautauvata na wekadrau mai na yasana ruarau.

 

E dau sega ni vakaduiduitaka e dua.

E kaya ni nona bula e muria sara tu ga vakavinaka na ka e dodonu me cakava e dua na marama tawavanua ki vua na nona turaga. Oqo wili kina na vakarautaki ni kena kakana, dabe ira ka me cobo.

Oqo na veika e cakava tiko ena nona vale ena veisiga kece.

 

Nira dau gole ena nodratou itikotiko mai Delai Labasa, e dau sega vakadua ni guilecavi me dau caka na masu ena Vitu na kaloko ena veiyakavi kece.

Oya e sa itovo tu ni nodrau bula na veiwatini ena veisiga.

E marama dau lotu, baleta ni susugi ka vakavulici vinaka yani ena nona loma ni vuvale.

 

Tukuna o Vereti na nona sa lai taura na itutu levu oqo ena matanitu, e sega ni vakabekataka baleta ni na lai tomana tiko ga na nona veiqaravi cecere vua na vunivalu ena vanua cava ga e rau na gole kina.

E sega ni ka vou vua na nona na lai veiqaravi ena vale ni Peresitedi.

“E dua na marama yalo malumalumu ka dau ciqoma eso nai vakasala keimami dau vakasalataki koya kina.”

 

Na nona bula e tutaka sara tuga okoya na soqosoqo ni marama ena koro, tikina ka vaka kina na yasana o Macuata.

Ena sega ni lai tu vakasuka ena veika ena lai sotava ena vanua rau na gole kina.

Oqo e tukuni ni veigauna ena yavusa o Namama na veikacivi ni Kalou kei na nona mai cabeta e dua na wekai keitou na itutu levu oqo.

E 12 na Tikina e tiko ena yasana Macuata ka 105 taucoko nai wiliwili ni koro.



Fijisun Ad Space


Get updates from the Fiji Sun, handpicked and delivered to your inbox.


By entering your email address you're giving us permission to send you news and offers. You can opt-out at any time.


Total Energies
For All Fiji Sun Advertising
Fijisun E-edition
Fiji Sun Instagram
Subscribe-to-Newspaper