Kana mai ena Buno ni Yadremu

E kamikamica na volivolitaki ena makete ka rawata tiko mai kina nai ivurevure ni bula.

Oqo na veika e vakaraitaka ko Anisi Marama na marama ka vakateveli tiko e na makete e Suva.

E sa yabaki 89 ko Anisi ka cavutu mai Nasavu, Rara, Naitasiri vakawati ka rua na luvena.

E levu e ra dau kaya me lako ki nakoro me vaka ni sa tiko ena dua na yabaki ni bula, ia e sega vakadua ni vakasuka na nodra vosa ka cakacakataka tikoga na veika me bula tiko kina.

“Au se tekivu vakamakete mai e na yabaki 1959 kei rau na noqu veitamani ka rau sa yali yani, me yacova mai nikua au se dabe voli ga e na makete”.

Vakaraitaka ni gauna oqo e sa qaravi koya sara tikoga vakataki koya ka raica ni kamikamica tikoga na vakamakete. Na cakacaka oqo e taleitaka vakalevu ka raica ni gauna taumada e vuli rawa kina ko irau na luvena ka voli kina e so na veika e bula tiko kina.

E na gauna oqo sa batabata na loloma, ka sa vinaka ga kina me da dui bula tikoga vakataki keda.

E volitaka tiko na niu, lalabi, sasa, moli kei na so tale na kena veimataqali. E dau lako yani vua ko ira na dau volivolitaki me ra laki volitaka vua na nodra ivoli, ka sega tale ni dua na vanua e laki volia mai kina.

E vakaraitaka ni dua na siga e rawa ni rawata toka e $100 kina $200 vakacaca, ka dau vakayagataka me voli tale kina e so na ivoli ka vakakina ka dau maroroi tale tiko e so me ilavo bula e na veisiga.

Tomana ni so na gauna e dau sotava e so na veivakacacani, ia e sega vakadua ni vakasuka ni kila ni se lomani koya tiko na Kalou.

Veivakasalataki tiko ko Anisi vei ira na lewenivanua ni usutu vinaka taudua sa ikoya na loma vinaka, ke vinaka tiko na lomada e da na raica ni toso vinaka na kena cicivaki ka qaravi na itavi cava ga e da gagadre tiko kina.

Vakatataro: salaseini.guniyaga@fijisun.com.fj