Mo Vakayagataka Vinaka na Gauna

Oqo nona mala ni vosa ko Petero Maciu, na cauravou ka vakayagataka na qele me rawata kina na nona bula.

E se qai yabaki 21 ko Petero ka cavutu mai Nawi, Buca Bay, Cakaudrove.

Tekivu na nona vakayagataka na qele e na gauna e se lailai kina ka dau vakauqeti koya tiko na turaga na tamana ko Sakapo Tui e na vinaka ni vakayagataki qele.

E ratou lewe lima vakaveitacini, ka karua ni gone ko Petero, ka ratou tiko vata ga kei na nona itubutubu e nakoro.

E yaco ga na nona vuli e na kalasi walu ka sega tale ni via tomana baleta ni sa raica na vinaka ni vakayagataki qele ka na rawata talega mai kina e levu sara na ka mai na nona vuli tiko.

E na yabaki 2020 e sa nanuma me na tekivutaka ga vakataki koya na nona iteitei ka me kua ni vakararavitaka tale vei dua.

E vakayagataka tikoga na nodra qele ni mataqali ko Koronicivaciva. E lima vakacaca na eka e teivaka tiko kina na nona yaqona, dalo, jaina, niu, kakana draudrau kei na so tale.

E na yabaki oqo e sa cavuta tale na nona yaqona ka volitaka e na makete e Labasa.

E kaya ni sa qai mai vakadinadinataka tu oqo na vinaka ni kena vakayagataki na qele me da teitei kina.

E volitaka na nona yaqona kina makete e Savusavu, ka tiko ena $70 kina $80 dua na kilo.

E na matai ni nona volivolitaki e rawata mai kina e $11,000 vakacaca.

E rauta tiko na lima na kilomita na balavu ni vanua e dau taubaletaka tiko e na veisiga me yaco kina nona iteitei. Ia, e sega vakadua ni tu vakasuka ko Petero e na nona sasagataka tikoga me rawati koya vinaka ka me valuti na bula dravudravua.

E so na gauna e sa dau laki keba tu ga e veikau me rawarawa vua.

Ena nona rai e kaya ni sa rauti koya vinaka saraga na vakayagataki qele, ka totolo talega na nona rawata na ivurevure ni bula. Na veicakacaka kece e sa gadrevi ga kina mo vosota.

Mai na veika e ra rawata e sa veivuke sara tiko kina vakalevu e na nona vuvale, vakacuru ilavo kina baqe, ka so na kena iwase e volia kina na kakana ni keba ka voli talega kina eso na wainimate kei na iyaya ni teitei.

E vakaraitaka ena vula ko Maji ni yabaki e yacova kina nona yabaki 21. E vakarautaka e rua na bulumakau ka sureti ira mai na lewenikoro me ra mai marautakavata na nona siganisucu.

E na loma ni rua na macawa sa oti, e volia kina e dua na nona tolili me vakarawarawataka na kena usani na nona yaqona kei na kakana mai na iteitei kina makete.

Tomana ni oqo e dua na ivakaraitaki vinaka vei ira na cauravou e ra tiko e nakoro, ka ra sega ni vakayagataka vinaka na nodra gauna me ra cakava kina e dua na ka yaga vakaoqo.

Ke rawa vua na matanitu me ra bau laurai yani na wekada e ra via tauyavutaka na nodra teitei ka me rawa ni ra vakaleleci yani e na kena iyaya me ra tekivu kina.

E na gauna oqo e gadreva tiko ko Petero e so na veivuke mai na iyaya ni teitei kei na itei ni kakana draudrau. E vinakata talega me vakavinakataki na gaunisala me vakarawarawataka na veilakoyaki kei na kena usani na itei me vaka ni dau kauta tu ga na ose me usani mai kina na nona yaqona.

Sa nona tatadra tiko me ra na teitei vakalevu me rawa ni ra tara e dua na nona vale, voli na qele itaoni me tara talega kina na vale ka me vakarawarawataka na nona vakamakete e Savusavu. Sa tuvana tale tiko ga me volia e dua nona misini ni cakacaka (tractor) me veivuke vua ena iteitei.

E levu na dredre e sotava me vaka na gauna ni draki ca, e dau vakaleqa nona tiko voli ena veikau.

E bolei ira tiko na itabagone ko Petero me ra teitei vakalevu me vaka ni levu na qele lala era tu noda vanua, ka dodonu me vakayagataka vinaka.

E kaya na bula dravudravua e da sa donumaka tu nikua, e sa kena iwali ga me da lesu kina noda delaniyavu ka vakayagataka vinaka na qele.

“Me biu tani na bula veimurimuri, me da vakarorogo vakalevu vei ira na noda itubutubu ka vakabibi na kena vakaliuci tiko na Kalou me noda kabasi tiko e na veigauna kece.”

Vakatataro: salaseini.guniyaga@fijisun.fj