Qaravi Vakavanua Na Lali Ni Lotu

E vakaraitaka mai na mataniva­nua levu mai Sawaieke, Gau o Nacanieli Bulivou Waqa, ni ra na solevutaka tiko na nodra lali kau vou ni lotu e nai ka 24 ni Seviteba.

Na lali oqo e sivita ko Rasoni Saqasere mai na koro o Somosomo.

Ni sa bera na sivi lali era a qarava na cakacaka vakavanua taucoko me baleta na kena sivi.

Na vesi e vakayagataki oqo e ratou sa solia tu na mataqali Navure me sivi kina na lali ia era mani lewa na turaga me qaravi ga na kena cakacaka vakavanua.

E kuria ni ra kauta e dua na vuni yaqo­na vata kei na dua na kamunaga me la’ki kerei kina na vuni vesi e Nabuisaqora ka me ratou solia talega na veivakadon­ui na kena la’ki vakabalei kei na kena caka na sivisivi ekea.

“Oqo e dua na vuni vesi levu ni rua na siga na kena varoti me bale,” e tukuna o Waqa.

Na kena la’ki kerei vakavanua e tuku­na o Waqa e lako vata tiko ni vanua e vakaitaukei ka ra na la’ki vakasosataki ena kena qaravi na sivisivi ka na rawa ni na yaco eso na vakacalaka me vaka na mavoa.

E tukuna o Waqa ni gauna kece e qar­avi kina na sivisivi me yacova ni oti, e sega sara ga ni dua na vakacalaka e yaco kivei koya e sivisivi kei ira na veivuke.

Era sa vakarautaka tiko ena gauna oqo na nodra na solevutaka na nodra lali ni lotu vou.

Na lali e vakayagataki tiko ena gauna oqo e sa makawa ka lailai.