Rawa ka Vinaka na Marama mai na Tuli Kuro

Oqo ena nodra sa gole vakayauyau tiko yani vei ira na saravanua, ka’ra volia na veicakacaka ni liga eso.

E ra sa sega tale ni qai goleva eso tale na veicakacaka ni liga, e ra sa vakanamata ga kina kena vakayagataki vinaka na qele e tu wavoliti ira me ra tuli kuro me ra rawa ilavo kina.

Na soqosoqo ni marama mai La-wai e yacana tiko na ‘Naboumasi-masi Pottery Club’.

E vakaraitaka ko Makelesi Adivugalei na liuliu ni isoqosoqo, ena gauna e liu era dau tuli kuro tu ga e tuba, ka sega na vale me ra dau vakarurugi kina.

Na kena vakabutari na dari mai na buka ka ukutaki vinaka ni bera ni volitaki.

Era veitomani tale tiko ga e lima na marama matua ka sa tiko nodra yabaki ni bula e na 70 Vakaraitaka ni vanua ko Lawai e dau kilai tani ni vanua ni tulituli me vaka ni tiko volekati ira na kena qele.

Na tuli kuro, e vakaraitaka o Makelesi ni tiko ga na mataqali qele era dau vakayagataka. Na qele dregadregata era dau vakayagataka ka tiko voli ga ena nodra yasa ni koro.

E ra sega walega ni tuli kuro na marama mai Lawai, e ra tulia talega na dari, kuro lalai, tutu ni senikau, me vaka na vonu, qari, boulu, luveni vuaka lalai kei na so tale.

Vakaraitaka ni ra sa na cakava vakavinaka na cakacaka ni liga oqo e sa na dewa sara me dua na ivurevure ni ilavo vinaka kina nodra koro vanua, vuvale, lotu kei na matanitu.

E kaya ni ra dau gole yani na saravanua e na vei otela me ra laki sarasara ka me ra laki vakadinadinataka talega na cakacaka ni liga e ra kilai tani kina na marama mai Lawai.

Tomana ni sa dodonu me ra vakabulabulataka tiko ga e so na vei mataqali cakacaka ni liga vaka oqo, baleta ni’ra a tekivuna mai o ira na noda qase.

"Kevaka e da vucesa e da na sega ni rawata e dua na ka."

Oqo na vosa e dau vakadreta vakalevu vei ira na marama me ra cakacaka vakaukauwa me vaka ni ra tiko ga e nakoro. Keimami sa tiko ga e nakoro era sa gole mai na dau volivoli, sa sega ni keimami lai volivolitaki tale i taoni.

Ko ira ni marama ni oti e dua na vula e sa qai soqoni na ilavo era dau soli vakailoloma vei ira.

Na ilavo oqo e dau vakagolei kina lotu, vanua, kei na nodra tuvatuva ni veivaka toroicaketaki na marama e na kena vakarabailevutaki na nodra cakacaka ni liga ka vakakina e so na kena iwase e gole kina matasiga.

Na veika e ra rawata na marama ena nodra volivoli taki esa yaga sara ga kina nodra vuvale.

E kerekere tale tikoga kina matanitu ko Makelesi, kevaka e tiko e so na vei-vuke me ra vukei yani kina na marama ka'ra tiko e na veitaudaku ni koro lelevu.

Veivakasalataki ko Makelesi vei ira na gone me ra vuli vakaukauwa me ra rawata na nodra vuli, kevaka sa sega ga ni rawati vakavinaka na vuli, qo saraga na vurevure ni ilavo e na veisiga ni mataka.

Vakatataro: salaseini.guniyaga@ fijisun.com.fj