Vakayagataki Nai Yaubula Me Bisinisi

Na levu ni iyau bula e tiko e yasada e rawa ni vukei keda me walia na mate ni kuli kei na so tale na mate e dau veitakavi.

Oqo na veika e vakaraitaka ko Asinate Vunakece Waqanivalu e dua vei ira na marama ka’ra vakaitavi e na siga ni Central Women Expo ka vakayacori e Vodafone Arena e na macawa sa oti.

E sa yabaki 58 ko Asinate ka cavutu mai Votua, Lekutu mai Bua.

E vakaraitaka ni oqo se qai karua ni yabaki na nona lewena tiko na soqosoqo ni volitaki cakacaka ni liga qo.

E kaya ni vakauqeti koya me lewena na soqosoqo oqo me vaka ni lewena tiko mai e dua na soqosoqo ka tiko e na Nausori, ka vakacurumi ira mai na soqosoqo o ya kina ‘expo’ e na yabaki sa oti.

E vakaraitaka ni sa cakava voli toka mai e na tolu na yabaki sa oti na cakacaka ni kena vakayagataki na veika e tu wavoliti keda me vakabulabulataka na yagoda.

E kaya ni vulica ga mai vale na cakava na waiwai vakaoqo ka a vakatovolea tu ga ka sega ni namaka me na mai rabailevu sara tu vakaoqo.

E kaya ni vakayagataka saraga na veika e tu wavoliti keda me ra wakia vata me cakava kina na waiwai ni yago.

E volivolitaki toka ga e vale, ka ra dau ota talega mai e so me ra mai volia na nona ivoli.

Paid Advertisement|March 24

E kaya ni levu na tamata e ra sa volia na nona ivoli ka ra kauta lesu tale yani vua na macala ni veika e volitaka ni sa vukei ira sara vakalevu.

Mai na noda rai na dauvolivoli e sa vakauqeti koya sara kina vakalevu me na tomana tikoga na nona cakava na ilumu ni yago oqo.

E ra wakia saraga na qilaiso me ilumu ni mate ni kuli ka vakakina na kura me sovu ni sili kei na so tale. E sega ni dua ka e ra volia me vaka ni sa tiko ga e yasa ni vale na veika e ra vinakata.

Na veika e volitaka e vakatokai ira tiko me ‘body lotion, organic body balm, herbal soap’ kei na so tale.

Na nodra ivoli e tiko na kena isau e na $3,$5,$10 kina $20.

E kaya ni dua na macawa e rawa ni rawata toka e $100 kina $300, mai na ilavo walega ni sovu kei na ilumu ni yago.

E kaya ni sega ni dua na ka e dredre kevaka walega me vakaliuci tiko na Kalou e na nomu veiqaravi.

Sa veivakasalataki tiko ko Asinate vei ira na nona icaba me ra kakua ni vakaweletaka na veika e tu wavoliti keda, ka da rawa ni cakava mai kina e so na ka me vukea na noda bula e na veika vakailavo ka vukea talega na nodra bula na lewenivanua e na veimate e so.

Vakatataro: salaseini.guniyaga@fijisun.com.fj