Rawati na Koroi e na Dela ni Vosota

Sega ni dua na tamata e wasea na vuli, kevaka e ra sa rawata ko ira na susu e na veitaoni e na rawa talega ni rawata ko i keda na siro sobu mai e na veicolo ni ulunivanua.

Oqo na veika e vakaraitaka ko Kelera Naitoko, na goneyalewa ka mai rawata na nona ivola ni qasenivuli ni murivuli (Diploma in Early Childhood Education Level 5) ni oti na nona tauri ivola e na koronivuli ni vuli torocake ena Univesiti ni Ceva ni Pasifika e na siga Lotulevu ni macawa oqo.

Ko Kelera e cavutu mai Korosavatu mai Nadarivatu ka vuli tiko e na koronivuli na Univesiti mai Lautoka.

Biuti mai na koro me ra gole mai ki Ba e na bibi saraga ni kena cuqeni tiko na vuli kei na sasagataki me rawati na cakacaka vinaka.

Ia nikua e sa mai rawati na ivola ka sasagataki tiko mai e na lima na yabaki sa oti, ka sa tu vakarau me na curuma yani na buturara ni cakacaka vakaqasenivuli ni murivuli e na noda vanua.

E luluvu na yalona me vaka na nona raica lesu na veisusu vinaka e vakayacori tiko mai vua e nakoro ka matai talega ni gone me tauri vola kina dua na koronivuli ni vuli torocake vakaoqo.

E vakavinavinakataka vakalevu na nona rawaka ki vua na Turaga e na nona sa mai yacova tu na vanua oqo.

Vakavinavinakataka vakalevu na veitokoni mai vale e na kena cuqeni tikoga na vuli e na veigauna taucoko.

Sa nona ituvatuva tiko me cakacaka, ia kevaka me sa ituvatuva ni Kalou me na tomana tale na nona vuli e sa na tomana tale ka me rawata tale e dua na nona koroi.

“E na veigauna taucoko e dau vakaukauwataki au tikoga ko ira na noqu vuvale mai nakoro, sotavi na dredre ni gaunisala, livaliva vakaoya ka vakakina na tinaqu ka tuberi au cake mai e na gauna au se lailai kina me yacova tiko mai nikua”.

Veivakasalataki ko Kelera vei ira na nona icaba me ra kakua ni dau yalo lailai e na kena sasagataki me rawati na takete cava ga e taketetaki tiko ka vakabibi na kena qaravi tikoga na Kalou e na veigauna taucoko.

Ko Amelia Talea na goneyalewa ka tauri vola mai na Univesiti ni Ceva ni Pasifika e na siga Lotulevu ni macawa oqo kei na turaga na tamana ko Waisake Bulewa.

AMELIA TALEA

Levu na dredre e da dau lako curuma, ia na veidredre kece oqori e na cava e na dua na siga ka da na tauca na vua ni noda vosota kei na cakacaka vakaukauwa.

Oqo na mala ni vosa e cavutu ko Amelia Talea na goneyalewa ka mai rawata na nona koroi ni vuli bisinisi se (Double Major in Bachelor of Management and Public Administration, International Business and Marketing) ni oti na nona taurivola e na koronivuli ni vulitorocake na Univesiti ni Ceva ni Pasifika e na siga Lotulevu ni macawa oqo.

E cavutu mai Lawaki, Tailevu ka vasu talega ki Nananu, Tailevu.

Levu sara na dredre e lako curuma mai ni se lailai kina, ka tuberi ka susugi tu ga mai vei nona Momo ka sa wilika tu ga me tamana e na gauna e se yabaki vitu kina me yacova tiko mai nikua.

E marau ka luluvu na yalona ni rai lesuva na dredre e lako curuma mai me mai yacova na nona sa mai tara na ivola ka tatadrataka tu mai e na vica na yabaki sa oti.

Vakaraitaka ni matai ni gauna e vuli kina e na Univesiti e ra taura na porokaramu ni Banking and Finance, ka qai mai veisautaka kina porokaramu e taura ivola kina oqo e na yabaki tarava.

E kaya ni tauri koya e lima na yabaki me vakacavara kina na vuli oqo, ka sa dua na bolebole levu ki vua ka vakakina kina nona vuvale.

“Au vota tikoga na koroi oqo ki vei noqu momo, na turaga ka susugi au cake mai e na gauna au se lailai kina me yacova tiko mai nikua”.

Tomana ni matai talega kina nona vuvale me tauri vola, ka oqo e vakaraitaka e dua na gaunisala vinaka ni kena vakadewataki tikoga na rawaka vakavuli kina loma ni vuvale.

Na dredre walega e sotavi oya na kena saumi na curucuru me vaka ni matai ni yabaki e veivuke vua na Tertiary Education Loan Scheme e na kena saumi na nona curucuru. Toso tiko na yabaki e ra sa sauma tikoga na nona icurucuru me vaka ni cakacaka tiko e na sitoa e New World e na gauna oya, ia nikua e sa tiko e na Judicial Department ka ma ni sauma oti kina na nona curucuru me yacova na nona sa mai taura na nona ivola nikua.

Sa nona ituvatuva tiko me na vakayacora kece sara na veika e tautaunaki vua, qarava na nona vuvale ka vakabibi e na kena tomani tikoga na qaravi Kalou e na veigauna taucoko.

Veivakasalataki ko Amelia vei ira na nona icaba me ra kakua ni dau yalo malumalumu e na kena sasagataki na tatadra cava ga e ra vinakata me ra rawata, ka vakabibi e na kena tusanaki tikoga e na veisiga na sasaga ki vua na tamada sa cecere sara.

Vakatataro: salaseini.guniyaga@fijisun.com.fj