Minister for iTaukei Affairs Ifereimi Vasu (seated nineth from left), with other Macuata chiefs from the province and delegates on November 28, 2024, at Sasa V illage. Photo: Shratika Naidu
E sa toso vinaka tiko na kena cakacakataki me vakatawani na itutu vakavanua e ra lala tiko e na noda vanua.
Na kena vakatawani na itutu vakavanua e na vukea vakalevu na veiliutaki e na Vanua, Lotu kei na Matanitu.
E sa vakatawani rawa e 415 na itutu vakavanua ka sa qai vo tikoga e 55 na itutu vakaturaga me vakatawani e na loma ni Yasana.
Related stories
Oqo na veika e vakaraitaka na Minisita ni Veika Vakaitaukei ko Ifereimi Vasu e na kena dolavi na bose ni Yasana ko Macuata ka vakayacori mai e na koro ko Sasa, Macuata, e na siga Lotulevu ni macawa oqo.
E vakaraitaka ni se qai qarava oti na valenivolavola ni veitarogivanua kei na yalava ni qoliqoli na kena vakadeitaki ka vakatawani rawa na veitutu ni turaga ni yavusa kei na turaga ni mataqali e na yasana vakaturaga ko Macuata.
Tomana ni sa qarava oti talega na veituberi ni matatimi ni sauvaki ni vanua ka salamuria tikoga qo na veiqaravi ni valenivolavola ni veitarogivanua ka qaravi tiko na itavi bibi oqo e na vula ko Okotova.
Vakaraitaka ni sa vakacagau tiko na cakacakalevu ni veivakatoroicaketaki ka sa yadrava tiko vakagumatua na matanitu na tiko vinaka vaka kawa itaukei kei na lewenivanua e Viti raraba.
MATANITU
E vakabibitaka na matanitu na nodra vuli na luveda ka vakabibi e na kena laveti na nodra qaravi na noda gone e ra se muri vuli kei na kena vakaukauwataki talega na kena vulici na itovo kei na vosa vaka itaukei e na noda veikoronivuli.
E kaya ni ra raica talega na matanitu na kena vakavinakataki na veiqaravi ni noda tabacakacaka ni bula, vakabibi na kena qaravi na noda veivalenibula kei na valeniwai e na loma ni Yasana.
Na kena vakavinakataki na bula raraba e na kena qaravi na gaunisala e vanua, veilakoyaki e wai, na vakadrodroi ni livaliva ka vakakina na wai.
E na veiyavu oqo e sa kauta lesu tale mai na matanitu na ‘Public Works Department’ me vakavinakataka na veiqaravi ni bula raraba.
E tiki talega ni nodra veiqaravi e na kena vakavinakataki na veiqaravi ni Tabacakacaka ni Teitei, ka saga na matanitu me na kauta mai na veivuke vakamisini me vakarawarawataka na kena teivaki na noda qele.
From left: Tui Labasa Ratu Jone Qomate and Minister for iTaukei Affairs, Ifereimi Vasu, at Sasa Village, Macuata, on November 28, 2024. Photo: Shratika Naidu
VEILIUTAKI MATAU
E vakaraitaka ni sa sagai tiko na bula ni veiliutaki matau ka sa sema tiko kina valenivolavola ni yasana e na kena tauyavutaki na veikomiti lalai e na veikoro, ka sa tekivu tale tikoga e na veitikina ka bau kina na veikomiti e na loma ni yasana.
E kaya ni yabaki qo e sa rogoci tiko na isevu ni gauna na veikomiti e na loma ni yasana ka oka kina na komiti ni vuli, tabagone kei na vica tale na komiti.
E vakavinavinakataka ni sa mai tauyavutaki rawa talega na isoqosoqo ni tabagone e na loma ni Yasana, ka kaya ni na sega ni vakavotukana na inaki ni kena tauyavutaki kevaka e sega ni vakabibitaka na vanua na nodra tokoni na itabagone.
VEIQARAVI NI TABACAKACAKA ITAUKEI
E sa mai qarava oti na Tabacakacaka iTaukei na railesuvi ni ‘itaukei administration, economic development unit, na bose levu vakaturaga ka vakakina na vakananumi ni yabaki 160 ni nodra yaco mai na wekada na Melanisia kina noda vanua.
TIKO VINAKA
E sa qaravi oti talega na buli tuvatuva ni yabaki lima ni veivakatoroicaketaki e na veikoro ka sa na mai rogoci ka vakadonui talega e na matabose na ituvatuva oqo.
E cavuta na vakavinavinaka kina valenivolavola nodra na turaga na talai veivuke e na vualiku e na vuku ni veituvatuva e so sa qaravi rawa tiko.
Tomana ni sa vakacagau tale tikoga na veitalanoa ni kena vakadaberi na ‘ice plant’ e na koro o Cawaro, ka oqo e ituvatuva levu tiko ni matanitu ka ratou sa cakacaka tiko na Tabana ni Qoliqoli ka veisemati vata tiko kei na valenivolavola ni Yasana.
E kaya ni sa qaravi tale tikoga na vuli ni tei lumi e na tikina o Namuka kei Dogotuki ka 24 na taqe wai sa kau oti e Cikobia.
VAKASALA
E tataunaka na turaga na Minisita ni Veika Vakaitaukei ko Ifereimi Vasu e vica na veikabibi me vaka na noda bulataka na bula ivakarau ka vakaituvatuva, na kena vakayagataki vinaka na gauna kei na maroroi ni yau bau rawati, na kena maroroi na veika e bula wavoliti keda ka da sautu tu kina,ka vakakina na bibi ni noda vakayagataka vakayalomatua me rawati kina na bula sautu ni noda vanua.
E sa kerea talega vei ira na lewenivanua e na nodra qarauni na luveda e na gauna ni sereki ni vuli oqo me rawa ni da yacova bula yani na yabaki vou.
Feedback: salaseini.guniyaga@fijisun.com.fj
