Tokona na Minisita na teitei veicurumaki vei ira na dau tei dovu

E na macawa sa oti  e ra veisiko voli na Turaga na Minisita ni Teitei, Sala ni Wai kei na Suka, ko Tomasi Tunabuna ena mua - ira ni noda vanua.

E na   nodra veisiko e ra lako sotavi ira na dauteitei ka vakadinadinataka tale ga na i walewale vou ni vakayagataki qele e sa vakayacori tiko me vakaukauwataki tiko kina na bula torocake kei na kena vakalevutaki na kakana ena veimatavuvale ena gauna bolebole eda donumaka.

Ena nona veisiko oqo, e a sotavi ira kina na dau tei dovu na turaga na Minisita koya era sa rawata na I walewale ni teitei veicurumaki, ena kena teivaki na kakana draudrau ka salavata kei na cakacaka ni tei dovu. 

Na sasaga oqo e vakaraitaka e dua na tubu vei ira na dauteitei me vakalevutaki na vakayagataki  ni qele, dua tale na gaunisala ni rawa I lavo, ka vakaukauwataki ira ena vuku ni veisau ni makete kei na I tuvaki ni draki. 

Veitalanoa kei ira na dau ni Tei suka e Lautoka.

E vakacaucautaki ira na dauteitei o Hon Tunabuna ena nodra ciqoma na i walewale ni teitei veicurumaki ka vakaraitaka na bibi ni kena cokoti vata na I walewale ni teitei makawa kei na kena teivaki na I tei e sau levu me vakadeitaka na veivakatorocaketaki e tudei. 

“O ira na dauteitei oqo era sa vakaraitaka tiko ni teitei veicurumaki qo e usutu ni kena tarai cake na bula sautu ka na yaga vakalevu ena bula ena noda vanua. E na nodra teivaka na kakana draudrau kei na dovu, ena vakalevutaka na nodrai vurevure ni lavo ka ra veivuke tale ga ena  kakana  ena nodra i tikotiko kei na noda vanua raraba,”e kaya o Hon Tunabuna. 

E vakadeitaka talegqa na minisita na nodra na veitokoni tiko vei ira na dauteitei na I vakalesilesi daurai teitei, ena nodra na vakatavulici na dauteitei ena i walewale ni teitei ena veiganiti kei na draki veiveisau ena bula ni veivakatorocaketaki. 

E vakayaloqaqataki ira na dau tei dovu kei ira na dauteitei era tiko ena taudaku ni veikoro lelevu  mera vakayagataka na i walewale ni teitei veicurumaki, e rawa ni na kauta mai na i lavo ena loma ni yabaki taucoko ka vakalailaitaka na vakararavi ki na dua ga na i tei. 

Na veisiko ena yasayasa vaka-ra e tiki ni nona veitaratara tiko na Tabacakacaka kei ira na dau teitei me kilai vakavinaka kina na veidredre era lako curuma, wasei na kila, ka raici na i wali ni leqa me na vakaqaqacotaka na veiqaravi ni Tabana ni Teitei ka vakatoroicaketaka na nodra bula na dauteitei.