Sega Ni Dua Na Ka e Dredre, Mo Dau Vosota

E liu e ra dau kilai tu ga na turaga ni ra dau kavetanitaka na waqa lelevu e so, ia e na gauna e daidai e sa rawa ni ra kavetanitaka talega na waqa ko ira na marama.

Oqo e vu beka e na veiveisau ni gauna ka veisau talega kina na rai ni vakasama vei keda e na gauna nikua.

Ke tiko na yalo ni dau vosota kei na nuinui vinaka e na tudei na veika kece o na vinakata mo na vakayacora.

Oqo na veika e vakaraitaka ko Vasemaca Aditukana na goneyalewa ka cavutu mai na koro o Matacula, Tailevu ka vasu ki Natadradave, Dawasamu, Tailevu.

Ko Vasemaca e yabaki 33 ka karua ni qase mai vei iratou na nona veitacini lewe ono.

E vakaraitaka ni sega ni namaka me na laki qarava na cakacaka ni kavetani ni waqa me vaka ni sega ni kai wai, ia e dau veivakarautaki na Kalou ka ni vunia tu e so na ka me baleti keda.

Ni oti mai na nona fomu vitu e na 2008 mai Suva Muslim College, e sega ni kila na vuli cava me na taura ka laki yacova na nona ciqoma e dua na sikolasivi mai vei iratou na vuli vuniwai e Tamavua.

E ma ni laki vakayacora na nona vuli vuniwai e na loma ni dua na yabaki ka sega ni rawata me vaka ni sega tikoga ni nona i tuvatuva.

E na 2010 e gole tale e na dua na vakatataro ni vuli idinia ni waqavuka ka vakayacori mai Nadi, ia e sega ni rawa baleta ni sega ni dua e na sauma na nona i curucuru ni vuli me vaka ni ligaiduataki voli tu ga mai vei tinana e na gauna a kalasi tolu kina.

E kaya ni vakaraitaka vei tinana me sa na tiko madaga e nakoro, me teitei ka veivuke tiko ga e vale ka qarava tiko e so na cakacaka lailai me vaka na sasamaki kei na savasava vei ira na nona qasenivuli mai Suva Muslim me rawa ilavo tu kina.

Mai na gauna o ya e sa qai vukei Vasemaca e dua na turaga ni Vanuabalavu ka cakacaka tiko vaka ‘Fleet Superintendent’ e na waqa ni vakau yaya ni matanitu (Government Shipping Services) ka tiko voli ga e na nodratou yasani vale.

E na yabaki 2011 e ratou lewe 20 na curu mera vuli tara GSS, o koya duadua ga na kena goneyalewa.

E vakaraitaka ni cakacaka qo e dau kilai tani tu ga kina ni nodra cakacaka na turaga, ia e na vuku ni tuvatuva e so e da dau vakayacora e na da na rawa ni rawata kina e so na cakacaka vaka oqo.

E tomana ka kaya ni levu sara na dredre e sotava e na nona laki vulici na cakacaka o ya me vaka ni sega saraga ni bau kila se tu vei koya e dua na i vola me vakadeitaka na vuli o ya ka vakakina e na nona kunekune voli e na yabaki 2015, ia e tomana tikoga na nona vuli me yacova na nona taura na nona i vola.

E va ga na yabaki na vuli cakacaka vaka ‘Apprentice’ e na waqa ni vakau yaya ni matanitu. Mai na 2011 kina 2015 e laki tomana na nona vuli ki na Fiji Maritime Academy e Laucala me laki vakaotia kina na i ka lima ni vakatagedegede (stage 5) ni nodra vuli na kavetani ni waqa.

Ia, e na gauna oqo e sa soko tiko e na waqa na Iloilovatu ka sa sokota oti mai na veiyanuyanu e na noda vanua ka sa tatadrataka tiko me na dua na siga me na sokotaka na waqa ki vanuatani.

E kaya ni dua na bolebole levu e sota kaya e na nona sasaga voli mai ka kaya ni levu na vosa e a rogoca mai vei ira na wekana, ia ke tiko na yalo ni dau vosota e na rawati vakavinaka na sasaga.

E kaya ni na nodra cakacaka e dau tekivu yani e ra me vaka na dre dali, vakasobu kako kei na so tale ka na qai dewa e na dua na vanua vinaka kevaka walega e tiko e yalomu na yalo ni dau vosota vakadede kei na yalo ni bolebole.

E veivakadreti tiko ko Vasemaca vei ira na tabagone me da kua ni yalo lailai kevaka e sa tiko e dua na cakacaka qarava sara e na kena yalo vinaka taudua kei na nomu i gu taucoko kevaka talega e sa soli vei iko e dua na i tutu vakacakacakacaka mo qarava sara vakavinaka baleta ni oqori na taledi e sa vakarautaki vei iko mo taukena.

Feedback: salaseini.guniyaga@fijisun.com.fj