Bula Vinaka na Apolo ena Colo kei Nadarivatu

Ena tukuni ni veigauna vei ira na lewenivanua mai na koro ko Navai, ena colo kei Nadarivatu na kena sa vua rawa ena nodra vanua na apolo.

Oqo na veika e vakaraitaka ko Maika Tuinakelo, na cauravou ni Navai ka vakamacalataka tiko na kena sa tubu ka vua vinaka na vuata oqo.

E sa yabaki 24 ko Maika ka cavutu mai Nasoqo, Nabobuco, Naitasiri ka susugi cake mai ena koro ko Navai.

Oqo e na nodra a veikau voli na nodra qase e na koro o Navai e na vuku ni qaravi vuli e na gauna o ya, ka’ra sa laki vakaitikotiko kina e so na lewenikoro mai Nasoqo me yacova mai e daidai.

E kaya ni veiyabaki sa oti e ra dau vakatovolea me ra teivaka na soreni apolo, ia e bula vinaka ka sega sara ni vua.

Ia, ena yabaki sa oti e ra raica kina ni sa vua ka sega ni levu na vuana, me vakatautauvatani e na yabaki oqo.

Oqori na ‘strawberry’ ka a vua talega ena koro ko Navai mai na colo kei Nadarivatu. E ra vakabauta na leweni- ni apolo e tautavata kei na apolo e ra dau vakau mai valagi. vanua ko Navai, ni veisau ni draki koya sa vakavuna me bula kina eso na vuata vaka oqo.

E kaya ni oqo na isevu ni kau vuata me vua e na yabaki oqo, ka tiko talega na uto, niu, maqo kei na so tale na kau vuata.

E vakaraitaka ni gauna e liu e sega ni vua kina na veimataqali kau vuata vaka oqo, ia qo e sa dua na veivakalougataki levu vei ira na lewenivanua.

Ni’ra tovolea na apolo mai Navai, e tautauvata na kena i kanakana kei na apolo era vakau mai valagi.

E kaya ni ra marautaka vakalevu ni oqo e dua na veivakalougatataki levu ka’na dua na yabaki vinaka vei ira.

E kaya e na vuku ni veiveisau ni draki e sa tubu kina e so na veikau vuata vaka oqo ka’ra sega ni dau laurai vakalevu e na noda vanua.

E vakamacalataka e na yabaki sa oti e tubu talega kina mai Nadarivatu na vuata ka vakatokai tiko me ‘strawberry’.

E kaya ni levu vei ira e ra teivaka yadua tu ga na vuna e na nodra yasa ni vale, ia ena yabaki oqo e sa dua na yabaki vinaka sara ka’ra raica kina ni sa vaka vuana.

Sa nodra ituvatuva tiko e na loma ni lima ni yabaki mai oqo, me ra na teivaka vakalevu na vuata oqo ka sa na rawa talega ni ra na volitaka e na vei makete e na noda vanua.

E kaya ni so na gauna e ra dau sotava talega e so na dredre me vaka na sisi ni qele, kei na waluvu ka dau vakacacana na nodra iteitei.

Vakatataro: salaseini.guniyaga@fijisun.com.fj