Cakacaka Ni Liga Magimagi Nai Yau Vakavanua Mai Cicia

“E dau mositi au vakalevu niu raica na kena sa yali ka seavu tiko yani vakamalua na noda itovo kei nai valavala dina na kawa itaukei.”

Oqo na veika e vakaraitaka ko Epeli Draunidalo Laliqavoka mai na koro ko Tarukua, Cicia mai Lau.

Esa yabaki 75 ko Epeli ka se taura dei voli ga na veika e dau raica mai vua na turaga tamana ena gauna a se lailai voli kina, sai koya na tali magimagi.

Oqo na nodra iyau vakavanua mai Cicia ni ra dau lako ki Lakeba vei Tui Nayau. E rua tiko nai yau vakavanua, na turaga e nona na magimagi, o ira na marama e nodra na loaloa. Na loaloa e vakaraitaka ko Epeli, ni balavu na kena italanoa.

E vakaraitaka ko ni magimagi e cakacaka levu, ka tiko ga na kawa ni niu e dau vakayagataki me tali kina na magimagi.

E dau lai beti mai na niu me bu vinaka, ka dau sega ni vakayagataki kina nai sele me kua ni mavoa. E dau mai suwa vinaka me tolu na taqana, ka qai tubu na kena lovo. Ni sa dau rara vinaka na lovo e dau kau mai na drau ni via levu kei na tolo ni jaina me kena inanai na gauna sa kau laivi kina na buka. Oti sa qai dau biu yani na magimagi. E dau qai kau mai na draunikau me ubi kina ni bera ni biu yani i cake na qele. Ni oti e bogi va sana qai buta na magimagi, ka sana qai roka damudamu na kena irairai. Ni sa samu oti sa qai dau sigani vinaka, ni bera ni tali.

E kaya ko Epeli e talanoa balavu na kena vakamuri vakamatailalai na cakacaka oqo.

Na magimagi loaloa kei na magimagi damu ena gauna sa tali oti kina ka vakasigani me mamaca vinaka.

Feedback: salaseini.guniyaga@fijisun.com.fj