Dolavi Na Volau Vou Ni Cakacaka

E dua na cavuikalawa vou era sa mua kina na lewe ni ono na yavusa ena yanuyanu o Kabara, Komo kei Namuka-i-Lau ni oti na kena mai dola e dua na nodra volau ni sivisivi kei na volivolitaki e Valelevu, Nasinu e na siga moniti ni macawa oqo.

Vakaraitaka na iliuliu ni soqosoqo ko Ponijasi Saulekaleka ni oqo e dua na ivakaraitaki vinaka kei na veivakatorocaketaki e na kena vakayagataki vinaka na iyaubula ka tu wavoliti keda me da rawaka kina.

Tomana ni bisinisi ni tikina oqo e vakamatanitutaki e na yabaki sa oti ka sa cici vinaka sara tiko e na gauna oqo.

Vakaraitaka ni inaki levu na kena tauyavutaki na bisinisi oqo sa ikoya e na nodra sasaga me maroroi na veika e kilai kina na nodra vanua mai Kabara oya na sivisivi kei na veicakacaka ni liga tale eso.

Tomana ni ra saga vakaukauwa tiko mai me tauyavutaki e dua na bisinisi ni ‘cooperative’ ka’ra nanuma me tauyavutaki e dua na bisinisi e ra kilai ga kina mai vanua sa ikoya na sivisivi kei na cakacaka ni liga tale eso.

Na cakacaka ni liga e ra a mai vakaraitaki na lewe ni ono na yavusa mai na tikina ko Kabara, Lau.

VAKAVINAVINAKA

Vakavinavinaka kina matanitu e na kena tokoni e so na bisinisi lalai vakaoqo me vaka ni gauna oqo e dau dredre na kena vaqarai e so na makete me volitaki kina na noda cakacaka ni liga.

Tomana ni ra veivuke na matanitu e na kena vakarautaki e dua na nodra volau ni cakacaka, veivuke talega e na kena vakamatanitutaki na bisinisi, veivuke e na kena caka na vuli ka vakakina e na nodra vukei talega yani e na misini ni cakacaka.

E ra cakava na cakacaka ni liga taucoko wili kina na tanoa, iwau, iula, cula ni bakola, iseru, kei na kena veimataqali tale eso.

E kaya ni ra volia ga mai vanua na tanoa, kei na vovo ni kau me ra mai cakava kina e so tale na cakacaka ni liga.

Na veika e ra na rawata e sa na veivuke vakalevu vei ira na veiwekani e na vuku ni kena qaravi e so na oga lailai eso ka me kua ni vakalomaocaocataki ira e na veika eso ka me ra vakatabakidua ga e na vuli kei na bula ni matavuvale.

Levu na bolebole e tiko ka vakabibi e na loma ni tikina ko Kabara me vaka ni levu e sega ni vakabauta ni ra rawa na inaki oqo me vaka ni levu na bisinisi e duri ga ka davo, ia oqo e sa bolebole levu tiko ni bisinisi e na nodra saga me veisautaki e dua na kena iwalewale me toro cake kina na bisinisi ni tikina ka vakakina na kena vaqarai na makete me rawa ni lako kina na ivoli ka me rawa ni cawiri na kena vakayagataki na ilavo.

E sa vakamamasu tiko ki vei ira na veiwekani mai Kabara kevaka e ra tokona na bisinisi e na vakaruataki tale vei ira na rawaka ni cava na yabaki ka vakabibi e na kena toso tikoga kina na bisinisi ni tikina e na vica na yabaki mai qo.

Feedback: salaseini.guniyaga@fijisun.com.fj