‘EDA RAWA NI RAWATA KECE’

E sega ni nodra cakacaka ga na marama, e ra rawa talega ni cakava na turaga ke tiko dina vei ira na yalo ni sasaga me ra rawata e so na cakacaka vakaoqo.

Tovolea me da dau vakabibitaka na veika e da kilai tani kina me vaka ni sa seavu tiko yani vakamalua vei keda na itaukei e na gauna edai.

Nikua e levu vei keda na itaukei e da sa sega ni kila na cakacaka ni liga vakaviti ka da dau kilai tani tu

kina e liu.

E sa ciri yawa sara vei ira na luveda me vaka ni sa sega ni dau vakabulabulataka ko ira na noda itubutubu kei ira na qase cake vei keda na kena vakayagataki e so na vuku vakaoqo.

Oqo na veika e vakaraitaka ko Noa Biuvulatolu, na cauravou yabaki 20 ka cavutu mai Yaroi, Matuku, Lau

ka vasu ki Vanuavatu.

E vakaraitaka toka ko Noa Biuvulatolu na i taba ni ibe ka sa kulata oti tu. Vei taba: Lesi Vanuavou\Facebook page

Vakaraitaka ni so na gauna kevaka e dau levu na ota, e sa dau vakauta e so na ibe na marama na tinana vua me laki kulata me totolo ka me veivuke e na kena cicivaki na bisinisi.

“E sega ni nodra cakacaka ga na marama, e ra rawa talega ni cakava na turaga ke tiko dina vei ira nayalo ni sasaga me ra rawata e so na cakacaka vakaoqo”.

E ratou lewe ono vakaveitacini ka so vei iratou e ra kila vinaka tiko na kena vakayagataki na cakacaka ni liga vakaoqo.

Tomana ni kevaka e da vakamuri ira vakalevu na qase, e da na qai kila sara mai kina na veika ka dau mesamesa kina ko i keda na itaukei.

Vakaraitaka ni veika vakaoqo e na bolei keda vakalevu na kawa itaukei e na bibi ni kena maroroi na noda itovo kei na veika e da kilai tani kina.

E kaya ni cakacaka oqo e na veivuke vakalevu kina vuvale ka vakakina e na kena qaravi na vuli me vaka ni se matai tiko ni yabaki ni nona vuli qasenivuli tiko mai Fulutoni (Fulton College) mai Nadi.

Vakaraitaka ni dua na ivurevure ni bula vinaka e kauta mai vei keda kevaka e da qarava vinaka, sega walega ni koya ya, e da na maroroya talega kina na veika e da kilai tani tu kina na kawa itaukei.

Vakaraitaka ni sa tiko talega na ituvatuva e na loma ni vica na macawa mai oqo e na kena caka edua na vuli me vaka ni levu vei ira na noda goneyalewa kei na marama e ra vinakata talega me ra vulica talega na cakacaka oqo.

AI VAKASALA

Veivakasalataki ko Noa vei ira na nona icaba me da tovolea me da kauta lesu tale mai na vuku ni vanua e da kilai tani kina me vaka na cakacaka ni liga, na sivisivi, kei na so tale me rawa ni vakabulabulataki tikoga kina, ka me kakua ni seavu vei ira na noda kawa e ra muri tiko mai e na veisiga ni mataka.

Feedback: salaseini.guniyaga@fijisun.com.fj