‘Esa Levu Na Vosa Veicurumaki, Yali na Vosa ni Sucu’

E dua na sala e rawa ni vakaukauwataki tale kina na noda i tovo kei na veika e da kilai tani kina na kawa itaukei sai koya me vakayacori tiko ga ena veiyabaki na kena vakananumi na noda vosa ni vanua.

Oqo na veika e vakaraitaka ko Jimaima Senirewa ka dua vei ira na marama e vakaraitaka na nona cakacaka ni liga ka tiko e na kena mai vakananumi tiko na siga ni vosa ni vanua ka vakayacori e Suva e na macawa oqo.

E sa yabaki 66 ko Jimaima ka cavutu mai Makadru,Matuku,Lau ka sa vakaitikotiko e na nodratou qele lisi ni teitei mai Lomaivuna, Naitasiri.

E marautaka o Jimaima na kena vakananumi na noda vosa ni vanua, me vaka ni raica lesu na nona matavuvale na vosa e sa veicurumaki tu ka sa yali na vosa ni sucu.

“Na vinaka ni vakayacori na soqo vaka oqo me da raica lesu kina na noda itovo kei na valavala ka vakauasivi na vosa ka da kilai tiko kina ka vaka kina na cakacaka ni liga me da maroroya tikoga ka da vakadewataka sobu yani vei ira na luveda e ra muri tiko mai.

E vakaraitaka e na yabaki 1980 e sa tekivu mai kina na nona vakadadamuria voli na talia na rubu.

E kaya ni gauna o ya e se lailai sara kina na kena isau mai na $5,toso tale vakalailai kina $6, e na gauna sa yacova kina na $10 a yaco na vuaviri e na yabaki 1987 ka ma ni tasogo kece kina na bisinisi.

Sa dede na gauna e sa qai vakatovotovotaka tale me talia na rubu ka raica ni sa tiko na kena isau mai na $40, ia e na gauna oqo e sa tiko sara e na $50.

E vakaraitaka ni rawa ilavo vinaka sara kina e na vula ko Tiseba me vaka ni volivolitaki e na dua na soqo ni lotu e lako kina ka nodratou itavi me ratou cakava e dua na cakacaka ni liga e tali e na voivoi.

E kaya ni o koya duadua saraga e na nodratou soqosoqo ni marama mai Lomaivuna e kila vakamatata na cakacaka ni liga oqo.

E vakaraitaka ni sega ni vulica mai vei dua, e na nona a raica ga ka qai vakasamataka na cava me na cakava e na rubu.

E talia tiko na rubu Ko Jimaima Senirewa ena nona vakaraitaki cakacaka ni liga.

E vakaraitaka ni qo e se qai kena imatai me na mai vakaitavi e na dua na soqo vaka oqo ka ni sa mai lewena talega na Fiji Arts Council ka ni levu ga na gauna e gole ga kina lotu ka vaka kina na nodra rally na marama me volivolitaki kina.

E sega ni namaka o Jimaima me na mai rabailevu sara tu vaka oqo na taledi ni cakacaka ni liga e vakarautaki vua.

E kaya ni maqosa sara e na tali rubu ka sega soti ni kila na talia tale e so na ka me vaka na ibe.

Na veika e rawata mai e sa dau tikica tani toka na nona wasewase kina lotu ka kena vo e sa qai vakayagataka kina vuvale.

Sa bolei ira tiko na nona itokani marama kei ira na goneyalewa ko Jimaima ni tu na noda dui taledi taucoko me vaka ni solia vei keda na Kalou me da vakayagataka ka me da kua ni vakaweletaka ka vaka kina me da wasea na taledi e tiko vei keda me na rawa ni bula tale kina e dua tale na itokani.

Vakatataro: salaseini.guniyaga@fijisun.com.fj