Gauna guiguilecavi vei Tunamasi

E dua na gauna guiguilecavi dredre vei Iowane Tuinamasi Kaveni e na nona sa mai taura na nona ivola e na koronivuli vakarautaki na Service Pro Institute e na siga Lotulevu ni macawa oqo ka a diva tu me tu talega i yasana ko irau na nona itubutubu.

E sa yabaki 27 ko Iowane Tuinamasi Kaveni ka cavutu mai Nakavika, Namosi ka mai ciqoma tiko na nona sitivikiti ni Tourism, Hospitality, Food and Bevarage and Front Office ka taura talega na ‘ best overall student in Tourism Operations’.

Vakaraitaka ni luluvu voli na yalona me vaka ni vakananumi rau na nona itubutubu ka rau sa yali ruarua yani ka a diva me tu talega e na siga ni tauri vola.

E a vuli voli mai Nakavika Primary School ka dewa yani kina Namosi Secondary School, tomana vakalailai na vuli e na vulitorocake ka ma ni sega ni vakacavara ni sa mai yaco na leqa e na loma ni vuvale, ka sa ma ni gu na yalona me na tovolea e so na vuli lalai vakaoqo ka sa mai vakavotukana sara nikua.

Ia nikua e sa mai taura na nona ivola ka vakarau me vakayagataka yani kina veibuturara ni cakacaka e na veiotela ni saravanua e na noda vanua.

E ratou lewe 11 kece vakaveitacini ka qarava taudua tikoga na nona vuli kei na ganena e vuli tale tikoga kina vulitorocake e Fiji National University.

E ono ga na vula na balavu ni gauna e taura na vuli oqo ka sa na lako talega vakakina na kena vuli tara e na veivanua ni cakacaka eso.

E cakacaka tiko e na sitoa na Shop and Save me sauma tiko kina na nona icurucuru.

 “E so na gauna au sa dau via vakasuka e na vuli, ia au vakavinavinakataka na Kalou na nona dau tokoni au voli tu e na veisasaga kece sara au vakayacora”.

Sa tiko na nona ituvatuva me na vakaqara na nona cakacaka kina veiotela me rawa ni vukei ratou kina na tacina ka ratou se vuli tiko nikua.

Veivakasalataki ko Iowane vei ira na nona icaba ni sega ni dua na ka e dredre e na vuravura oqo, kevaka sa tiko vei iko na yalo ni vuli, vakayacora sara me vakakina ka bibi tikoga na nomu vakatulewataka vakavinaka na nomu gauna ka mo rawa ni rawata kina na nomu vuli.

Vakatataro: salaseini.guniyaga@fijisun.com.fj