Gunuvi Na Wai Savasava E Tavuki

E tukuna o Sailasa Boteanakadavu, na mata ni tikina o Tavuki kina Bose ni Yasana o Kadavu, ni wai oqo e lako ga mai na nodra soniwai ia e tavuloni.

Na wai e drodro kina imatai ni taqe ka sinai kina na vatu ka vakadewataki sara ki nai karua ni taqe ka sinai ena laselase. Ni qai vakadewataki ki nai ka tolu ni taqe sa savasava vinaka ka sa rawa talega me gunuvi.

Keimami na lewe ni vanua keimami gunuva na wai e tavuloni.

E tukuna ni ra gunu talega kina nai vakalesilesi ni matanitu, vica nai tiko­tiko vakagalala kei ira na gonevuli ni Tavuki District School.

Na koronivuli oqo era vuli kina na gone ena vica na koro ena loma ni tiki­na.

E vakavinavinakataki na matanitu ena veivuke levu oqo.

Nai yaya ni kena vakavinakataki na nodra soniwai sa kau talega yani.

GONEVULI

E dua na kauwai e a vakaraitaka ena veitalanoa kei na Paraiminisita sai koya na nodra sega ni rawa ni vakaitavitaki na gonevuli ni Richmond Methodist Secondary School kei Vunisea Second­ary School ena vuli ena `online’ ka va­kayacori ena gauna e veitauvi kina na COVID-19 ena noda vanua.

E mai vakavuna na lutu ni kedra maka ena veitarogi ni Year 12 kei na Year 13 .

Ia era marautaka ni rogoci na nodra kerekere me vakalutumi sobu na maka ni curu kina univesiti kei na kena kerei na sikolasivi.

Sa kerei talega me tara e dua na nodra bure na qasenivuli ena Vunisea Sec­ondary School.

E tukuna o Boteanakadavu ni gau­na oqo e levu era tiko ena taudaku ni koronivuli, ka na vinaka me tara na nodra bure mera rawa ni ra tiko vole­kati ira na gonevuli ena vuku ni nodra taqomaki.

Feedback:  maikab@fijisun.com.fj