Isevu Ni Koroi Mai Na Vuli Nasi

Esega ni dua na ka e dredre, kevaka walega me na vaka deitaki tiko I lomada ni na rawa ni cabeti e so na veiulunivanua cecere vaka o ya.

Oqo na veika e vakaraitaka ko Salaseini Bureni na goneyalewa ni Nakorovou, Serua, ka dua vei ira na tauri vola e na vuli nasi mai na Fiji National University; ka vakayacori e na Vodafone Arena e na siga Vukelulu sa dromu.

E cavu i sausau e na nona matavuvale ni a matai ni lewe ni vu vale me rawata e dua na koroi ni cakacaka vaka nasi.

Vakaraitaka ni oqo e sa dua na i vakaraitaki vinaka ka me vakayaloqaqataki ira na gonevuli e ra muri tiko mai me ra cakacaka vakaukauwa.

A vuli voli e Lomary Secondary School mai na Fomu tolu kina Fomu vitu, ka kaya ni dau tatadrataka voli tu me na laki vuli qasenivuli, ia ka ma ni seva na madigi oya ni sa ciqoma e liu na i vola ni kerekere ni vuli nasi e Tamavua.

E marau ka luluvu tale ga e na gauna a ciqoma kina na nona i vola, ka kaya ni votu mai matana na tubuna me vaka ni a susugi koya voli mai e na nona se lailai me la'ki yacova na nona sa mai takali e na Okotova, 2022.

A susu voli tu ga mai vei rau na nona tukai, ka kaya ni dau volivolitaki voli tu ga e na bati ni gaunisala e na kena sagai tikoga me rawati vinaka na vuli vei iratou na makubuna.

Dau veivakasalataki voli tu na qase vei koya me dau vakaliuca vinaka na Kalou, qarava vakavinaka na vuli me yacova na kena i yalayala ka me ra rawata na nodra bula mai muri.

Levu na dredre e lako curuma voli e na nona vuli tu me vaka ni curu i bure ka yawa mai vale, ka vaka kina na nona mai yali yani na tura­ga ka dau tokona vakalevu na nona vuli.

"Na vei dredre kece oqo e rawa ni valuti kevaka walega me dei tiko na vakabauta, ka vakakina me da masulaka ka lolovaka tikoga na vei sasaga kece me vaka ni da lako curuma tiko oqo e dua na draki ni bula dredre ka sa dodonu me da tu valaka vinaka na veika kece sara e da vakayacora," kaya ko Salaseini.

Sa nona tatadra me na lewena na Tabana ni Bula e na noda nibera ni la'ki tomana tale yani na nona vuli kei na cakacaka i vale me vukea kina na nona vuvale.

"E sega ni dua na ka e dredre, kevaka walega o biuta tiko na nomu vakasama na vuli se cakacaka cava ga e vakayacori tiko e na rawa sara vakavinaka, ka usutu levu taudua ga me vakaliuci vinaka na Kalou ka ni kabasi voli tiko ni lakolako e da lakova tiko oqo."

Feedback: salaseini.guniyaga@fijisun.com.fj