Janueri -Vakatokai Me Vula I Nuqa Levu

E da sa kidavaka tale yani oqo e dua na yabaki vou ka tu vata na kena i colacola kei na i tavi me qaravi kina.

Na i matai ni vula e na loma ni yabaki, sa i koya na vula ko Janueri ka’ra dau vakatoka na noda qase me vula i Nuqa Levu.

Oqo na vula e dau levu kina na ika oqo na Nuqa ka yacana vaka peritania na ‘Rabbit fish’.

Na vanua e ka bibi vei keda na itaukei ka sema talega ni noda veiwekani mai na gauna makawa ki na gauna oqo, vaka kina vei ira na noda kawa mai muri.

Na vanua e vakabalebaletaki ena qele, ia e ra sema talega kina kau, manumanu, uciwai, ulunivanua kei na vanua ni qoliqoli.

E na vula oqo e se tomani tikoga na gauna ni uca ka se gauna talega ni cagilaba.

E NA ITEITEI

• E dau ‘lou na were, karusa na ivavakada ka tabu ni lakovi ni suasua na qele de karaca na uvi.

• E dau levu na vuata, matua na uto ka sa via oti mai na maqo.

• E dau dreu na dawa kei na wi ka se na ivi.

• E dau se na lagakali, bua kei na caucau.

• E dau dreu talega na misimisi.

E WAITUI

• E ya na lairo ka vakabibi na lairo damu me dereneke i waitui ka ra tobotobo rawarwa e na bogi buto.

• E dau levu sara na nuqa kei na ki ka dau katoa na kena ba.

• E dau gauna ni bulubulu (luve ni qio). E dau rai na matadra ni vidi na sinu.

• E dau matua na kuku, kalakala kei na kaikoso.

• E dau yati na vivili me vaka na madrali, bosucu kei na tadruku.

• E du kunei ni gaga e so na mataqali ika.

Vakatataro: salaseini.guniyaga@fijisun.com.fj